Dil Raju : ఇటీవల సినిమా ఇండస్ట్రీకి సంబంధించిన ఎన్నికలు ఎంత రసవత్తరంగా మారుతున్నాయో ప్రత్యేకంగా చెప్పనక్కర్లేదు. మా ఎన్నికల తర్వాత తెలుగు చలనచిత్ర వాణిజ్య మండలి ఎలక్షన్స్ అంత హోరా హోరీగా సాగాయి . ఈ ఎన్నికల్లో అగ్ర నిర్మాతలు అయినా సి. కల్యాణ్, దిల్ రాజు పోటీ పడ్డారు. దిల్ రాజు ప్యానెల్ ను విజయం వరించింది. సి. కల్యాణ్ ప్యానెల్ ను ఓడించి దిల్ రాజు ప్యానెల్ గెలుపు జెండాను ఎగురవేసింది. ప్రొడ్యూసర్ సెక్టార్ లోని మొత్తం 12 స్థానాలకు ఏడింటిలో దిల్ రాజు ప్యానెల్ విజయ కేతనం ఎగురవేసింది. ఇక డిస్ట్రిబ్యూషన్ సెక్టార్ లో రెండు ప్యానెల్స్ నుంచి చెరో ఆరుగురు విజయం అందుకున్నారు. ఎగ్జిబిటర్స్ సెక్టార్ లో ఏక గ్రీవంగా ఎన్నికైన వారు కూడా దిల్ రాజుకు మద్దతు ఇచ్చే అవకాశం ఉందని తెలుస్తోంది.
స్టూడియో సెక్టార్ లో గెలుపొందిన నలుగురిలో ముగ్గురు దిల్ రాజు ప్యానల్ వారే కావడం విశేషం. నిర్మాతల విభాగంలో దిల్ రాజు ప్యానెల్ నుంచి 12 మందిలో ఏడుగులు గెలుపొందారు. వైస్ ప్రెసిడెంట్ గా ముత్యాల రామదాసు, కార్యదర్శి గా దామోదర్ ప్రసాద్, ట్రెజరర్గా ప్రసన్న కుమార్ ఎన్నికయ్యారు. మొత్తం 48 ఓట్లలో నిర్మాత దిల్ రాజుకి 31 ఓట్లు పడ్డాయి. దిల్ రాజుకు మెజారిటీ రావడంతో తెలుగు ఫిల్మ్ ఛాంబర్ అధ్యక్షుడుగా ఎన్నికైయారు. ఇక ప్రొడ్యూసర్ సెక్టర్ చైర్మన్గా శివలంక ప్రసాద్, డిస్ట్రిబ్యూటర్ సెక్టర్ ఛైర్మన్గా మిక్కిలినేని సుధాకర్, జాయింట్ సెక్రటరీగా భరత్ చౌదరిలు గెలుపొందారు.
ఎన్నికలకి ముందు దిల్ రాజు మీడియా సమావేశంలో ఆసక్తికర వ్యాఖ్యలు చేశారు. పాలిటిక్స్లోకి వస్తున్నారు కదా.. ఈ ఫిల్మ్ ఛాంబర్ ఎన్నికలు ట్రైల్ రన్ అనుకోవచ్చా? అని ఓ రిపోర్టర్ అడగడంతో.. దిల్ రాజు నువ్వుతూ ఆసక్తికరమైన సమాధానం ఇచ్చారు. ‘నేను రాజకీయాల్లోకి వస్తానని ఎప్పుడూ మీకు చెప్పలేదు కానీ.. అది జరుగుతుంది. తరువాత ఏమి అవుతుందో ఎలా చెప్తారు? కానీ మీరు అన్నట్టుగా రాజకీయాల్లోకి వెళ్తే ఏ పార్టీ అయినా సరే ఎంపీగానో.. ఎమ్మెల్యేగానో.. ఇంకోటో సీటు ఇవ్వొచ్చు నేను గెలవొచ్చు. కానీ రాజకీయాలు వేరు.. ఇండస్ట్రీ వేరు . నేను ప్రెసిడెంట్గా నిలబడితే.. కిరీటాలు ఏమీ రావుకదా. నేను వెళ్లి ఆ కుర్చీలో కూర్చుంటే నాకు ఇంకా సమస్యలు పెరుగుతాయి. కిరీటాలు పెట్టరు. నా ప్రశాంతత పోతుంది. అయినా సరే ఎలక్షన్స్లో పోటీ చేస్తున్నాం అని చెప్పుకొచ్చారు దిల్ రాజు.
