CI Anju Yadav : అంజూ యాదవ్.. ఈ పేరు గత కొద్ది రోజులుగా మీడియాలో తెగ నానుతుంది. నడిరోడ్డుపై విపక్ష నాయకులపై చేయిచేసుకున్నా.. సాటి మహిళను బూటుకాళ్లతో తన్ని వివస్త్రను చేసి ఈడ్చుకెళ్లినా.. ఆ అధికారిణిపై ఎలాంటి చర్యలు తీసుకోకుండా కేవలం ఛార్జిమెమోతో సరిపెట్టేశారు. బాధ్యతాయుతమైన పదవిలో ఉంటూ తొడగొట్టి సవాళ్లు విసురుతున్నా.. ఉన్నతాధికారులు కనీసం మందలిచ్చే సాహసం కూడా చేయడం లేదు. శ్రీకాళహస్తి సీఐ అంజూయాదవ్‌ అక్రమాలు, అవినీతిపై ఫిర్యాదులు ఉన్నా.. శాఖాపరమైన చర్యలకు పోలీసు శాఖ మాత్రం వెన‌క‌డుగు వేస్తూ వ‌చ్చింది.
అధికార పార్టీ అరాచకాలకు కొమ్ముకాస్తున్నందువలనే ఆమెపై ఎలాంటి చర్యలు తీసుకోవ‌డం లేద‌నే విమ‌ర్శ‌లు ఉన్నాయి.రీసెంట్‌గా ఆమె జనసేన నేత‌పై చేయి చేసుకోగా, కేవలం ఆమె నుండి వివ‌ర‌ణ కోరుతూ చార్జి మెమో జారీ చేశారు. గ‌తంలో ఆమె హోట‌ళ్ల ముందు తొడ‌కొట్ట‌డం, వెకిలి న‌వ్వుల‌తో హెచ్చ‌రించ‌డం వంటివి ఇప్పుడు సోషల్ మీడియాలో తెగ హ‌ల్‌చ‌ల్ చేస్తున్నాయి. అయితే జనసేన నాయకుడు కొట్టే సాయిని సీఐ కొట్టిన విషయమై ఆ పార్టీ అధ్యక్షుడు పవన్ కళ్యాణ్.. తిరుపతి ఎస్పీకి ఫిర్యాదు చేసిన విష‌యం తెలిసిందే. దీనిపై స్పందించిన ఎస్పీ. ఈ ఘటనపై పూర్తి స్ధాయిలో విచారణ చేసిన తర్వాత చర్యలు తీసుకుంటామని పవన్ కల్యాణ్ కు చెప్పినట్లు పేర్కొన్నారు. సీఐ ప్రవర్తనపై ఉన్నత స్ధాయి అధికారితో విచారణ జరిపిస్తామన్నారు.
గ‌తంలో అంజూ యాదవ్ పై ఉన్న ఆరోపణలు, వీడియోలు గత రెండు రోజులుగా సోషల్ మీడియా వైరల్ గా మారాయని చెప్పుకొచ్చారు. తాజాగా జరిగిన ఘటనలో మాత్రం అంజూ యాదవ్ తో పాటు కొట్టే సాయిని కూడా విచారస్తామని అన్నారు. కేవలం అంజూ యాదవ్ ప్రవర్తన తీరుపై మాత్రమే పవన్ కల్యాణ్ తనతో ప్రస్తావించినట్లు వివరించారు. సాధ్యాసాధ్యాలను పరిశీలించి శాఖాపరమైన చర్యలు తీసుకుంటామని హామీ ఇచ్చారు. పవన్ ఎంట్రీతో ఇప్పుడు అంజూ యాదవ్ అరాచకాల‌కి బ్రేక్ ప‌డేలా కనిపిస్తుంది.
