Odisha Train Accident : ఒడిశాలో మ‌హా ఘోరం చోటు చేసుకున్న సంగ‌తి అంద‌రికీ తెలిసిందే. ఒడిశాలోని బాలాసోర్ జిల్లాలో ఉన్న బ‌హ‌న‌గ బ‌జార్ రైల్వే స్టేష‌న్ స‌మీపంలో శుక్ర‌వారం సాయంత్రం 6.55 గంట‌ల‌కు ఈ పెను విషాద‌క‌ర‌మైన సంఘ‌ట‌న చోటు చేసుకుంది. మొత్తం మూడు రైల్లు ఢీకొన్న ఈ సంఘ‌ట‌న‌లో ఇప్ప‌టి వ‌ర‌కు సుమారుగా 300 మందికి పైగానే చ‌నిపోయారు. 1000 మందికి పైగా తీవ్ర‌గాయాల‌య్యాయి. యావ‌త్ దేశాన్ని ఈ సంఘ‌ట‌న ఒక్క‌సారిగా కుదిపేసింది. అయితే ఈ ప్ర‌మాదం వెనుక అస‌లు కార‌ణం ఏమిటో బ‌య‌ట ప‌డింది. ప్ర‌త్య‌క్ష సాక్షి తెలిపిన ప్ర‌కారం వివ‌రాలు ఇలా ఉన్నాయి.
ఈ ప్ర‌మాదంలో బెంగ‌ళూరు నుంచి హౌరా వెళ్తున్న సూప‌ర్ ఫాస్ట్ ఎక్స్ ప్రెస్, కోర‌మాండ‌ల్ ఎక్స్ ప్రెస్, మ‌రో గూడ్స్ రైలు ఢీకొన్నాయి. అయితే కోర‌మాండ‌ల్ ఎక్స్ ప్రెస్‌లో ప్ర‌యాణిస్తూ ప్ర‌మాదం నుంచి ఎలాంటి గాయాలు లేకుండా బ‌య‌ట ప‌డిన అనుభ‌వ్ దాస్ అనే ప్ర‌యాణికుడు ఈ ఘోర సంఘ‌ట‌న‌కు చెందిన వివ‌రాల‌ను.. ప్ర‌మాదం ఎలా జ‌రిగింది.. అనే విష‌యాల‌ను మీడియాకు తెలియ‌జేశాడు.
కోర‌మాండ‌ల్ ఎక్స్ ప్రెస్ ప‌ట్టాలు త‌ప్పి లూప్ లైన్ ట్రాక్‌లో ఉన్న గూడ్స్ రైలును ఢీకొట్టింది. దీంతో కోర‌మాండ‌ల్ ఎక్స్ ప్రెస్‌కు చెందిన బోగీలు ప‌క్క‌నే ఉన్న మ‌రో ట్రాక్‌పై ప‌డ్డాయి. అయితే అదే స‌మ‌యంలో అటుగా వ‌చ్చిన హౌరా సూప‌ర్ ఫాస్ట్ ఎక్స్ ప్రెస్ ఆ బోగీల‌ను ఢీకొట్టింది. దీంతో మూడు రైళ్లే ఢీకొనే స‌రికి ప్ర‌మాద తీవ్ర‌త మ‌రింత‌గా పెరిగింది. కాగా సిగ్న‌లింగ్ వ్య‌వ‌స్థ‌లో లోపం వ‌ల్లే ఈ ప్ర‌మాదం చోటు చేసుకుంద‌ని రైల్వే వ‌ర్గాలు తెలియ‌జేస్తున్నాయి.
ఇక ఒక ట్రాక్‌పై రైళ్లు రెండూ వ‌స్తే అల‌ర్ట్ చేసే యాంటీ ట్రెయిన్ కొల్లిజ‌న్ సిస్ట‌మ్ ఆ రూట్‌లో అందుబాటులో లేద‌ని రైల్వే శాఖ‌కు చెందిన ఓ ప్ర‌తినిధి వెల్ల‌డించారు. ఆ వ్య‌వ‌స్థ ఉండి ఉంటే ఇంత‌టి పెను ప్ర‌మాదం చోటు చేసుకుని ఉండేది కాద‌ని అన్నారు. ఈ క్ర‌మంలోనే ఈ సంఘ‌ట‌న‌తో ప్ర‌జ‌లంద‌రూ ఉలిక్కిప‌డ్డారు. రైలు ప్ర‌మాదం అంటేనే భ‌య‌ప‌డాల్సిన ప‌రిస్థితి వ‌చ్చింద‌ని భావిస్తున్నారు. కాగా ఇప్ప‌టి వ‌ర‌కు ఎన్నో రైలు ప్ర‌మాదాలు చోటు చేసుకోగా ఇదే అతి పెద్ద ప్ర‌మాద‌మని భావిస్తున్నారు.
