Ram Gopal Varma : సంచ‌ల‌న ద‌ర్శ‌కుడు రామ్ గోపాల్ వర్మ ఎప్పుడు ఏం చేస్తాడో ఎవ‌రికి అర్ధం కాదు. ఎవ‌రిని తిడ‌తాడో, ఎవ‌రిని స‌పోర్ట్ చేస్తాడో కూడా అర్ధం చేసుకోవ‌డం క‌ష్టం. ఒక‌ప్పుడు టాలీవుడ్ సినిమా రూపు రేఖ‌లు మార్చేసిన ఆర్జీవి ఇటీవ‌లి కాలంలో పెద్ద‌గా స‌క్సెస్ అందుకోలేక‌పోతున్నాడు. అయితే యూట్యూబ్ ఛానెల్ తో అప్పుడ‌ప్పుడు సంద‌డి చేస్తూ ఉండే వర్మ .. ఇప్పుడు ‘నిజం’ పేరుతో మరో యూట్యూబ్ ఛానెల్‌ను ప్రారంభిస్తున్నారు. వైఎస్ వివేకానంద రెడ్డి హత్య వెనకున్న నిజానిజాలను తవ్వి తీయడమే తన ‘నిజం’ ఛానెల్ ముఖ్యోద్దేశం అంటూ సంచ‌ల‌న కామెంట్స్ చేశాడు.
మీడియాకు ఒక ప్రకటనను విడుదల చేస్తూ… అలాగే, ట్విట్టర్ ద్వారా వరుస ట్వీట్లతో వివరించారు. ఈ చానల్ ప్రారంభోత్సవానికి ఈ నెల 25వ తేదీ సాయంత్రం 4 గంటలకు ముహూర్తం నిర్ణయించారు. తన యూట్యూబ్ చానల్ ముఖ్య ఉద్దేశం అబద్ధాల బట్టలు ఊడదీసి నిజాన్ని ఆవిష్కరించడమేనని వర్మ తెలిపారు. ‘నిజం’ యూట్యూబ్ చానల్ లో కేవలం పొలిటికల్ కాంట్రవర్సీలు మాత్రమే కాకుండా, కొన్ని కరెంట్ సిట్యుయేషన్స్, సైన్స్, హిస్టరీ, కృత్రిమ మేథ, సెక్స్, ఫిలాసఫీ, పోలీస్, క్రైమ్, న్యాయస్థానాలు… ఇలా ఎన్నెన్నో టాపిక్స్ ఉంటాయని ఆయ‌న తెలియ‌జేశారు.
ఇక సీనియర్ పాత్రికేయురాలు స్వప్న కూడా కొన్ని ఎపిసోడ్స్ లో పాల్గొంటారని, కొన్ని అంశాలను తాను విశ్లేషిస్తానని, కొన్ని అంశాలు స్వప్న విశ్లేషిస్తారని వర్మ వెల్లడించారు. నిజాన్ని గౌరవించే ప్రతి ఒక్కరికీ ‘నిజం’ చానల్ గొడుగు కింద ప్రత్యేక స్థానం ఉంటుందని పేర్కొన్నారు. తన యూట్యూబ్ చానల్ లో తొలి ఎపిసోడ్ ను ‘వివేకా హత్య వెనుక నిజంలో అబద్ధముందా?’ అనే టాపిక్ పై ఉంటుందని వెల్లడించారు. తన చానల్ లోగోను కూడా వర్మ ఆవిష్కరించారు. నిజాన్ని చంపడానికి ప్రయత్నించడం కోసమే అబద్ధం బతుకుతుందని.. కానీ నిజాన్ని ఎవ్వరూ చంపలేరని పేర్కొన్నారు. కానీ, నిజం అప్పుడప్పుడూ చచ్చిపోయినట్టు నటిస్తుందని.. దానికి మోసపోయి, చచ్చింది అని అబద్ధాలు చెప్పే వాళ్లు సంబరంతో డాన్సులు చేస్తుంటే ఏదో ఒక రోజు అది వెనుక నుంచి ముందుపోటు పొడుస్తుందని తనదైన శైలిలో వర్మ వివరించారు.
