Krishna Assets : సూపర్ స్టార్ కృష్ణ (79) ఇక లేరన్న సంగతి తెలిసిందే. ఆదివారం అర్ధరాత్రి గుండెపోటు రావడంతో ఆయనను హైదరాబాద్ గచ్చిబౌలిలోని కాంటినెంటల్ హాస్పిటల్ కు కుటుంబ సభ్యులు తరలించారు. మల్టిపుల్ ఆర్గాన్స్ ఫెయిల్ అవ్వడంతో ఆయన మంగళవారం తెల్లవారుజామున 4 గంటలకు తుది శ్వాస విడిచారు. కృష్ణ మరణం తెలుగు చిత్ర పరిశ్రమలో పెను విషాదాన్ని నింపింది. ఇక కృష్ణ మరణం సందర్భంగా ఆయన వృత్తిపరమైన మరియు వ్యక్తిగత జీవితానికి సంబంధించి ఎన్నో విషయాలు తెరపైకి వస్తున్నాయి. ఈ క్రమంలోనే ఆయన ఆస్తి వివరాలు కూడా సోషల్ మీడియాలో వైరల్ అవుతున్నాయి. 1965లో కృష్ణ తేనే మనసులు చిత్రంతో హీరోగా ఎంట్రీ ఇచ్చారు. అప్పుడే టాలీవుడ్ లో కొత్త శకం మొదలైనట్లు అయింది. హీరోగా కృష్ణ అందుకోని విజయాలు అంటూ లేవు.
అంత పాపులారిటీ దక్కినప్పుడు కృష్ణ ఆర్థికంగా అపర కుబేరుడిగా ఎదిగి ఉండాలి. కానీ అది జరగలేదు. డబ్బు విషయంలో కృష్ణ ఎప్పుడూ అమాయకత్వంతోనే ఉండేవారట. ఈ విషయాన్ని విజయనిర్మల ఓ ఇంటర్వ్యూలో కూడా తెలిపారు. సూపర్ స్టార్ కృష్ణ సంపాదించిన మొత్తం ఆస్తుల విలువ 300 కోట్ల వరకు ఉంటుందని అంచనా. తన స్వంత గ్రామం బుర్రిపాలెంలో, హైదరాబాద్, చెన్నై నగరాల్లో కృష్ణ పేరిట ఇళ్ళు ఉన్నాయి. అలాగే ఫామ్ హౌస్ లు కూడా ఉన్నాయి. కృష్ణ గారి గ్యారేజ్ లో మొత్తం 20 కోట్ల విలువ చేసే 7 కార్లు ఉన్నట్లు తెలుస్తోంది. సూపర్ స్టార్ కృష్ణ ఇమేజ్ తో పోల్చుకుంటే ఆయన సంపాదించిన ఆస్తులు చాలా తక్కువే అని ఇండస్ట్రీలో చాలా మంది అభిప్రాయం. ఒకే సమయంలో పద్మాలయ స్టూడియోస్ బ్యానర్ నుంచి నాలుగైదు సినిమాలు రిలీజ్ చేసిన సందర్భాలు ఉన్నాయి.
దీంతో ఆర్థిక లావాదేవీల విషయంలో గందరగోళం నెలకొనడం, డబ్బు నష్టపోవడం జరిగేది. ఇక కృష్ణ గారికి ఆయన బలం ఆయనకే తెలియదట. తొలి చిత్రం తేనె మనసులుకి 2 వేలు రెమ్యునరేషన్. 2, 3 చిత్రాలతోనే కృష్ణకి స్టార్ డమ్ వచ్చేసింది. కానీ నిర్మాతలని రెమ్యునరేషన్ డిమాండ్ చేయడం తెలియదట. స్టార్ డమ్ ఉన్నప్పటికీ 10 వేలు రెమ్యునరేషన్ చేరుకోవడానికి కృష్ణకి 35 సినిమాల సమయం పట్టిందట. అలాగే చెక్కులు ఇవ్వకుండా ఎగ్గొట్టిన వారు కూడా చాలామంది ఉన్నారు అని కృష్ణ ఓ ఇంటర్వ్యూలో అన్నారు. నిర్మాత కష్టాల్లో ఉంటే రెమ్యునరేషన్ తగ్గించుకోవడం.. సినిమా ఫెయిల్ అయితే తక్కువ రెమ్యునరేషన్ తో అదే నిర్మాతకి డేట్లు ఇవ్వడం లాంటివి కృష్ణ గారి మంచి మనసుకి నిదర్శనం. ఒక దశలో అప్పుల కారణంగా పద్మాలయ స్టూడియో మూతపడే పరిస్థితి కూడా వచ్చిందని వార్తలు వచ్చాయి. మహేష్ బాబు హీరోగా సక్సెస్ అయ్యాక కృష్ణ ఫ్యామిలీ ఆర్థికంగా నిలదొక్కుకున్నారు.
