క‌న్న‌డ సినిమా కాంతార చిత్రం ఎంత సెన్సేష‌న్ క్రియేట్ చేసిందో ప్ర‌త్యేకంగా చెప్ప‌న‌క్క‌ర్లేదు. క‌న్న‌డలోనే కాకుండా దేశ వ్యాప్తంగా ఉన్న అన్ని భాష‌ల‌లోను ఈ సినిమాకి మంచి ఆద‌ర‌ణ లభించింది. గీతా ఆర్ట్స్ అధినేత అల్లు అరవింద్ కాంతార సినిమాను తెలుగులో గ్రాండ్ గా విడుదల చేసిన విషయం తెలిసిందే. ఆ సినిమా తెలుగు ఆడియోన్స్ ను ఎంతగానో ఆకట్టుకుంది. ఇక టాలీవుడ్ మార్కెట్ వద్ద ఆ సినిమా 50 కోట్ల గ్రాస్ కలెక్షన్స్ అందుకోవడం విశేషం. అయితే ఇప్పుడు గీత ఫిలిమ్స్ డిస్ట్రిబ్యూషన్ తోనే మరొక హిందీ డబ్బింగ్ సినిమాను తెలుగు ప్రేక్షకులకు అందించబోతున్నారు.
వరుణ్ ధావన్ కొత్త చిత్రం భేడియా. ఈ చిత్రం హిందీ, తమిళం అలాగే తెలుగులో పాన్ ఇండియా తరహాలో నవంబర్ 25 న 3D వెర్షన్ లో రిలీజ్ కానుంది. తెలుగులో ఈ సినిమాను తోడేలు టైటిల్ తో విడుదల చేస్తున్నారు. అమర్ కౌశిక్ దర్శకత్వంలో తెరకెక్కిన ఈ సినిమాలో కృతి సనన్ హీరోయిన్ గా నటించింది. హారర్ కామెడీగా ఈ సినిమాను తెరకెక్కించారు. ఈ సినిమాకు సంబంధించిన ట్రైలర్ కు కూడా ఆడియెన్స్ నుంచి మంచి రెస్పాన్స్ వచ్చింది.
ఇక ఈసినిమాను అల్లు అరవింద్ “గీత ఫిల్మ్ డిస్ట్రిబ్యూషన్” ద్వారా తెలుగులో రిలీజ్ చేస్తున్నారు. రెండు తెలుగు రాష్ట్రాల్లోనూ ఈసినిమాను రిలీజ్ చేస్తున్నారు. కాంతార ద్వారా భారీగానే లాభాలు రాబ‌ట్టిన అల్లు అరవింద్ ఇప్పుడు తోడేలు చిత్రంతో ఎంత లాభ‌ప‌డ‌తాడా అని ప్ర‌తి ఒక్క‌రు ఆలోచ‌న‌లు చేస్తున్నారు. కాగా, వరుణ్ ధావన్ ఎక్కువగా కామెడీ సినిమాలతోనే బాక్సాఫీస్ వద్ద మంచి విజయాలను సొంతం చేస్తున్నాడు. ఇక అతనికి దేశ వ్యాప్తంగా అభిమానులు ఉన్నారు. ఇక అతను తొలిసారి భేడియా సినిమాతో పాన్ ఇండియా ప్రేక్షకులను ఆకట్టుకోవడానికి ప్రయత్నిస్తున్నాడు. ఈ సినిమాను జియో స్టూడియోస్ అలాగే దినేష్ విజన్ ప్రెజెంట్ బ్యానర్లలో నిర్మించారు.
