Kesineni Nani : వైసీపీ నేత, ఎంపీ కేశినేని నాని ఇటీవ‌ల సంచ‌ల‌న వ్యాఖ్య‌ల‌తో వార్త‌ల‌లో నిలుస్తున్నారు. ముఖ్యంగా టీడీపీ నాయ‌కుల‌తో పాటు వారి ఛానెల్స్‌పై అలానే కొంద‌రు చేసే కామెంట్స్‌పై కూడా ఘాటుగా స్పందిస్తున్నారు. రాష్ట్రాభివృద్ధిపై దమ్ముంటే తనతో చర్చకు రావాలని టీడీపీ అధినేత చంద్రబాబు ఏపీ సీఎం జగన్ కు సవాల్ విసిరిన సంగతి తెలిసిందే. ఎవరిది స్వర్ణయుగమో, ఎవరిది రాతియుగమో తేల్చుకుందాం అన్నారు. దీనిపై విజయవాడ ఎంపీ కేశినేని నాని స్పందించారు. జగన్ దాకా ఎందుకు… చర్చకు నేను సిద్ధం అంటూ చంద్రబాబుకు కౌంటర్ ఇచ్చారు. అమరావతిలో సచివాలయం కడితేనే అభివృద్ధి అంటారా? లేక, గ్రామ గ్రామానికి ఓ సచివాలయం కడితే అభివృద్ధి అంటారా? అని ప్రశ్నించారు.
ఎటు చూసినా జగన్ చేసిన అభివృద్ధి కనిపించడంలేదా? అని నిలదీశారు. ఏదో ఈనాడు పేపర్ మన చేతిలో ఉంది కదా అని రాసేస్తున్నారని మండిపడ్డారు. ఆ రోజున ముఖ్యమంత్రిని లొంగదీసుకుని ఈనాడు పేపర్ ద్వారా రామోజీరావు 2 వేల ఎకరాల్లో పెద్ద కోట కట్టుకున్నాడని, ఆ కోటలోంచి రామోజీరావు ఆంధ్రాను చూస్తుంటాడని కేశినేని నాని విమర్శించారు. తన కోట అభివృద్ధిని చూసుకున్న రామోజీరావుకు ఇవన్నీ అభివృద్ధి కింద కనిపిస్తాయా అని వ్యంగ్యం ప్రదర్శించారు. ఆ కోట లోపల ప్రత్యేకంగా ఒక విమానాశ్రయమే ఉంది, రామోజీ ఫిలిం సిటీయే ఉంది అని అన్నారు.
“అందుకే ఆయన చంద్రబాబు చేసిందే అభివృద్ధి అనుకుంటున్నాడు, అంటూ కేశినేని చెప్పుకొచ్చాడు. ఇక బీసీల‌కి ఛాన్స్ ఇవ్వ‌డం లేదంటూ కొంద‌రు మాట్లాడుతున్నారు. నా ప‌క్క‌న ఉంది ఎవ‌రు. మీరు ఎవ‌రో గొట్టంగాడి ద‌గ్గ‌ర‌కు వెళ్లి వారు ఏదో మాట్లాడితే ఆ గొట్టం తీసుకొచ్చి ఇక్క‌డ పెట్టి అడిగితే ఎలా, మీరు కూడా విశ్లేష‌ణ చేయాలి కదా నాని ఫైర్ అయ్యారు. జగన్ అంద‌రికి సమన్యాయం చేస్తాడు. అంతేకాని ఎవ‌రు ఏదో మాట్లాడ‌డం దానికి స‌మాధానం చెప్ప‌డం ఏంట‌ని ఆగ్ర‌హం వ్యక్తం చేస్తున్నారు.
