Uttam Kumar Reddy : తెలంగాణ అసెంబ్లీ చాలా వాడివేడిగా సాగుతుంది. బీఆర్ఎస్, కాంగ్రెస్ నాయ‌కుల మ‌ధ్య హోరాహోరీగా పోరాటం సాగుతుంది. ఏపీలో ఆయకట్టులో లేని ప్రాజెక్టులు నిర్మాణానికి కేసీఆర్ సహకారం ఉందని తెలంగాణ అసెంబ్లీలో మంత్రి ఉత్తమ్ కుమార్ రెడ్డి ఆరోపించారు. కెఆర్‌ఎంబికి సాగునీటి ప్రాజెక్టుల్ని అప్పగించేది లేదని తీర్మానం సందర్భంగా ఏపీ అసెంబ్లీలో కేసీఆర్‌కు ధన్యవాదాలు చెబుతూ జగన్ రెడ్డి చేసిన ప్రసంగాన్ని తెలంగాణ అసెంబ్లీలో ప్రదర్శించారు.మొదటగా జగన్ మాట్లాడిన ఓ వీడియోను కాంగ్రెస్ హ్యాండిల్స్‌ వైరల్ చేశాయి. ఆ వీడియోలో నీళ్ల విషయంలో కేసీఆర్ ఉదారత చూపించారని జగన్ చెప్పారు. కేసీఆర్ సీఎంగా ఉన్నప్పుడే కృష్ణా జలాలను ఏపీకి అప్పగించారంటూ కాంగ్రెస్ శ్రేణులు ఈ వీడియోను వైరల్ చేశారు.
తెలంగాణ అసెంబ్లీ ఎన్నికల్లో నవంబర్‌ 30న పోలింగ్‌ జరగడానికి ముందు ఒక్క రోజు 29 అర్థరాత్రి ఏపీ ప్రభుత్వం నాగార్జున సాగర్ కుడి గట్టు గేట్లను బలవంతంగా స్వాధీనం చేసుకుందన్నారు. ఎన్నికల్లో లబ్ది చేకూర్చడానికి ఆ సమయంలో జగన్ అలా చేశారనే అనుమానం అందరికి ఉందన్నారు. 400-500 మంది బలగాలతో 5వేల క్యూసెక్కుల నీటిని విడుదల చేసుకున్నారన్నారు. ఆ సమయంలో కేసీఆర్, జగన్‌కు మంచి సంబంధాలు ఉన్నాయని, కేసీఆర్ ఓడిపోతున్నారని తెలిసి జగన్ ఆంధ్రా పోలీసుల్ని సాగర్ మీదకు పంపారనే అనుమానాలు ఉన్నాయని ఉత్తమ్ ఆరోపించారు. సాగర్ గేట్లను స్వాధీనం చేసుకునే విషయంలో ఈ రోజుకు కేసీఆర్ ఈ విషయంలో ఒక్క మాట కూడా మాట్లాడలేదన్నారు.
అయితే బీఆర్ఎస్ నేతలు కాంగ్రెస్ తప్పుడు ప్రచారాలకు తెరలేపిందని, ఎడిటెడ్ వీడియోలను వైరల్ చేస్తోందని మండిపడుతున్నారు. జగన్ స్పీచ్‌కు సంబంధించిన పూర్తి వీడియోను బీఆర్ఎస్ నేతలు స‌ర్క్యులేట్ చేస్తున్నారు. గోదావరి నీళ్లను శ్రీశైలం లేదా సాగర్‌కు తరలించి కృష్ణా ఆయకట్టును కాపాడుకుందామని కేసీఆర్ ఉదారత చూపారని జగన్ చెప్పారు. పైన నాసిక్ నుంచి వచ్చే ప్రధాన పాయ నుంచి గోదావరికి నీళ్లు రావట్లేదని.. తెలంగాణలో ఉన్న ప్రాణహిత, ఇంద్రావతి దాదాపు 50 శాతం గోదావరికి నీటిని తీసుకువస్తున్నాయని జగన్ చెప్పారు. ఇక కృష్ణాపై కర్ణాటక ఇబ్బడిముబ్బడిగా ప్రాజెక్టులు కట్టడంతో నీళ్లు రాలేని పరిస్థితి ఉందని జగన్ అన్నారు. అయితే కాంగ్రెస్ మాత్రం కృష్ణా నీటిని ఏపీకి కేసీఆర్ దోచి పెట్టారన్నట్లుగా ప్రచారం చేస్తోందని బీఆర్ఎస్ నేతలు మండిపడుతున్నారు.
