Raghava Lawrence : రాఘవ లారెన్స్ గురించి తెలుగు ప్రేక్ష‌కులకి ప్ర‌త్యేకంగా చెప్ప‌న‌క్క‌ర్లేదు. ఆయన త‌మిళంతో పాటు తెలుగులోను అల‌రించాడు. ఆయన మంచి న‌టుడే కాదు కొరియోగ్రాఫ‌ర్ తో పాటు సామాజిక చైత‌న్యం ఉన్న మంచి మనిషి. లారెన్స్ ఎప్పుడు కూడా ఎవ‌రికి హాని చేయడు. త‌న‌వంతు సాయాన్ని న‌లుగురికి అందించాల‌నే త‌పన ఆయ‌న‌లో ఎప్పుడు ఉంటుంది. ప్ర‌స్తుతం రాఘవ లారెన్స్ ప్రధాన పాత్రలో దర్శకుడు పి. వాసు తెరకెక్కించిన చిత్రం చంద్రముఖి2 . ఈ సినిమా 2004లో సూపర్ హిట్‌గా నిలిచిన చంద్రముఖి సినిమాకు సీక్వెల్‌గా సెప్టెంబ‌ర్ 15న ప్రేక్ష‌కుల ముందుకు రానుంది. ఈ క్రేజీ ప్రాజెక్ట్‌లో బాలీవుడ్ క్వీన్‌ కంగనా రనౌత్ ఫీ మేల్‌ లీడ్ రోల్‌లో నటిస్తోంది. ఇప్పటికే ఈ సినిమా నుంచి విడుదల చేసిన ఫ‌స్ట్ లుక్ పోస్ట‌ర్‌తో పాటు.. పాట‌ల‌కు మంచి స్పందన వస్తోంది.
ఇటీవ‌ల చంద్రముఖి 2 ఆడియో లాంచ్ జరిగిన విషయం తెలిసిందే. ఈ ఆడియో ఫంక్ష‌న్‌లో ఓ బౌన్సర్‌కు స్టూడెంట్‌కు మ‌ధ్య గొడవ జరిగింది. ఓ స్టూడెంట్‌పై లారెన్స్ బౌన్సర్ చేయి చేసుకున్నాడనే వార్త సోషల్ మీడియాలో వైరల్‌గా మారింది. ఈ విషయం తెలిసిన రాఘవ లారెన్స్ వెంటనే సోషల్ మీడియా వేదికగా రియాక్ట్ అయ్యారు. ఈ విషయంపై స్పందించడమే కాకుండా లారెన్స్ తన బౌన్సర్లపై మండి పడ్డాడు. అలాగే దాడికి గురైన వ్యక్తికి ఆయన క్షమాపణలు కూడా తెలియజేశాడు. అందరికి నమస్కారం. చంద్రముఖి 2 సినిమా ఆడియో లాంచ్ సందర్భంగా బౌన్సర్‌లలో ఒకరు కాలేజీ స్టూడెంట్‌తో గొడవకు దిగిన దురదృష్టకర సంఘటన గురించి నాకు ఇప్పుడే తెలిసింది. ముందుగా ఈ సంఘటన గురించి నాకు తెలియదు, ఆడియో లాంచ్ జరుగుతున్నప్పుడు ఈ ఘ‌ట‌న బయట జరిగింది.
నేను విద్యార్థులను ఎంతగా ప్రేమిస్తానో, వారు ఎదగాలని నేను ఎంతగా కోరుకుంటానో అందరికీ తెలుసు. నేను గొడ‌వ‌ల‌కు చాలా దూరంగా ఉంటాను. మనం ఎక్కడికి వెళ్లినా ఆనందం, శాంతి ఉండాలని కోరుకుంటాను. కారణం ఏమైనప్పటికీ, ఎవరినైనా కొట్టడం ఖచ్చితంగా తప్పు. ముఖ్యంగా స్టూడెంట్‌గా ఉన్నప్పుడు ఇది జరగకూడదు. ఆడియో లాంచ్‌లో ఇలా జ‌ర‌గ‌డంపై నేను వ్యక్తిగతంగా క్షమాపణలు చెబుతున్నాను. ఇక నుంచైనా బౌన్సర్‌లు ఇటువంటి కార్యకలాపాలలో పాల్గొనవద్దని నేను మనస్పూర్తిగా అభ్యర్థిస్తున్నాను. ధన్యవాదాలు.’ అంటూ లారెన్స్ తెలియజేశాడు.
