Arjun Tendulkar : ప్రస్తుతం ధ‌నాధ‌న్ లీగ్ ఐపీఎల్ హోరా హోరీగా సాగుతుంది. ఈ సీజ‌న్‌లో చాలా మంది యువ క్రికెట‌ర్స్ త‌మ అదృష్టాన్ని ప‌రీక్షించుకుంటున్నారు. టీమిండియా లెజెండ్ సచిన్ టెండూల్కర్ కుమారుడు అర్జున్ టెండూల్కర్ ఇటీవలే ఐపీఎల్ అరంగేట్రం చేసిన సంగతి తెలిసిందే. బౌలింగ్‌లో అద‌ర‌గొడ‌తాడ‌ని అభిమానులు భావించ‌గా, పంజాబ్‌తో ఆడిన మ్యాచులో శామ్ కర్రాన్, హర్‌ప్రీత్ సింగ్ ఇద్దరూ అర్జున్ బౌలింగ్‌లో చెలరేగారు. కేవలం ఒక్క ఓవర్లోనే 31 పరుగులు పిండుకున్నారు. దీంతో అతనిపై నెట్టింట తెగ ట్రోలింగ్ జరిగింది. అయితే లెజెండరీ పేసర్ బ్రెట్ లీ మాత్రం అర్జున్‌కు మద్దతుగా నిలబడ్డాడు.
కొత్త బంతితో అతను అద్భుతంగా బౌలింగ్ చేస్తున్నాడు. ముంబై టీంలో అందరి కన్నా ఎక్కువగా బంతిని స్వింగ్ చేస్తున్నాడు. ప్రస్తుతం అతన్ని మిడిల్ ఓవర్లలో వాడుకోవడం బెటర్. అనుభవం పెరిగేకొద్దీ డెత్ ఓవర్లలో కూడా రాణిస్తాడు అని బ్రెట్‌లీ స్ప‌ష్టం చేశాడు. ఇక గుజరాత్ టైటాన్స్‌తో జరిగిన మ్యాచ్‌లో అర్జున్ టెండూల్కర్ అద్భుతంగా బౌలింగ్ చేశాడు. పవర్ ప్లేలోనే రెండు ఓవర్లు వేసిన అర్జున్.. ఓ వికెట్ తీయడంతో పాటు 9 పరుగులే ఇచ్చాడు. ఒక్క బౌండరీ కూడా ఇవ్వని అర్జున్.. ఏడు డాట్ బాల్స్ వేసాడు. డేంజరస్ వృద్దిమాన్ సాహాను కీపర్ క్యాచ్‌గా పెవిలియన్ చేర్చాడు.
ఇక బ్యాటింగ్‌లోను అద‌ర‌గొట్టాడు అర్జున్. గుజరాత్ టీమ్ ఇచ్చిన భారీ లక్ష్యాన్ని ఛేదించే క్రమంలో ముంబై తరఫున తొమ్మిదో స్థానంలో బ్యాటింగ్ కి వ‌చ్చిన అర్జున్.. మోహిత్‌ శర్మ బౌలింగ్‌లో డీప్‌స్వ్కేర్‌ దిశగా ఒక భారీ సిక్స్‌ బాదాడు. అలా దీనికి ఈ లీగ్‌లో తొలి సిక్స‌ర్ ల‌భించింది. ప్రస్తుతం అతను సిక్స‌ర్ కొట్టిన వీడియో ప్రస్తుతం సోషల్ మీడియాలో తెగ హల్‌చల్ చేస్తోంది. అర్జున్‌లో బౌలర్ మాత్రమే కాక మంచి బ్యాటర్ కూడా ఉన్నాడని, బ్యాటింగ్‌లో ప్రమోషన్‌ ఇవ్వాలని పలువురు అభిమానులు అభిప్రాయపడుతున్నారు. బ్యాటింగ్‌లో 9 బంతులలో ఒక భారీ సిక్సర్‌తో పాటు 13 పరుగులు చేశాడు అర్జున్.
Arjun aims BIG 🎯#GTvMI #IPLonJioCinema #TATAIPL #IPL2023 pic.twitter.com/cF4DZVviUm
— JioCinema (@JioCinema) April 25, 2023
