Gangavva Home : మై విలేజ్ షో యూట్యూబ్ ఛానల్ ద్వారా పాపులర్ అయిన గంగవ్వ బిగ్ బాస్ 4 లోకి అడుగుపెట్టి ఆ త‌ర్వాత తెలుగు రాష్ట్రాల్లో అందరికీ ద‌గ్గ‌రైంది. యూట్యూబ్ వీడియోలలో తన సహజ నటనతో ఆవిడ రెండు రాష్ట్రాల్లోనూ ఎంతోమంది అభిమానులను సంపాదించుకున్నారు. ప్రస్తుతం సెలబ్రెటీగా మారిన గంగవ్వ ఓ ఛానెల్‌కి ఇచ్చిన ఇంట‌ర్వ్యూలో ఆస‌క్తిక‌ర విష‌యాలు పంచుకుంది. తన ఇంటి కోసం నాగార్జున ఎంత సాయం చేసాడో కూడా వివరించింది. బిగ్ బాస్ నాలుగో సీజన్ లో పాల్గొన్న గంగవ్వ, 5 వారాల పాటు హౌస్ లో ఉంది. అనారోగ్యంతో బ‌య‌ట‌కు వ‌చ్చేసింది.
అయితే వారానికి 2 లక్షల చొప్పున ఆమె 10 లక్షల రెమ్యూనరేషన్ అందుకుంది. అయితే ఎలిమినేషన్ సందర్భంగా తనకు ఓ ఇల్లు నిర్మించుకోవాలనే ఆశ ఉన్నట్లు నాగార్జునకు చెప్ప‌డంతో ఆమె కలను తాను నెరవేర్చుతానని నాగార్జున హామీ ఇచ్చారు. గంగవ్వకు ఇల్లు కట్టించి ఇస్తానని చెప్పారు. దీంతో బిగ్ బాస్ ఇచ్చే రెమ్యూనరేషన్ కాకుండా తాను వ్యక్తిగతంగా గంగవ్వకు సాయం చేస్తానని నాగార్జున ఆ వేదిక‌పై ప్రకటించారు. అన్నట్లుగానే నాగార్జున సాయం చేయడం, బిగ్ బాస్ వాళ్లు ఇచ్చిన డబ్బుతో గంగవ్వ ఇల్లు పూర్తయింది. అయితే, గంగవ్వ ఇంటికోసం నాగార్జున ఎంతిచ్చారనే విషయం మాత్రం ఇప్పటి వరకూ బయటపెట్టలేదు.
ఈ విష‌యంపై అటు నాగార్జున కానీ, ఇటు గంగవ్వ కానీ ఎప్పుడు చెప్ప‌లేదు. తాజాగా, నాగార్జున తనకు ఇచ్చిన సొమ్ము ఎంతో గంగవ్వ చెప్పేశారు. రూ. 7 లక్షలు ఇచ్చారని వెల్లడించారు. బిగ్ బాస్, హీరో నాగార్జున సాయంతో తన సొంతింటి కల నెరవేరిందని గంగవ్వ ఆనందం వ్యక్తం చేశారు. మొత్తం ఇల్లు కట్టేందుకు 20 లక్షలు ఖర్చు అయినట్లు గంగవ్వ చెప్పుకొచ్చింది. ఇక డీఎన్‌కే కన్ స్ట్రక్షన్స్ సంస్థ ఈ ఇంటిని అద్భుతంగా నిర్మించిందని, రెండు బెడ్రూంలు, ఓ హాల్, కిచెన్, పూజ గది, మూడు బాత్రూంలు.. చుట్టూ ప్రహరీ ఏర్పాటు చేసిందని కూడా పేర్కొంది. తనకు నటన అంటే చాలా ఇష్టం అని చెప్పిన ఆమె, ప్రస్తుతం యూట్యూబ్ షోలు చేస్తున్నట్లు వివరించింది.
