Radhika Sarathkumar : కోమలి అనే సినిమాతో తమిళంలో ఒక్కసారిగా స్టార్ అయిపోయిన డైరెక్టర్ ప్రదీప్ రంగనాథన్. ఆయన దర్శకత్వం వహించిన రెండో సినిమా లవ్ టుడే. ఈ సినిమాలో హీరో కూడా ఆయనే. ఇవానా హీరోయిన్. సత్యరాజ్, రాధికా శరత్‌కుమార్ కీలక పాత్రలు పోషించారు. తమిళనాడులో నవంబర్ 4న విడుదలైన ఈ సినిమా సూపర్ హిట్ టాక్ తెచ్చుకొని యువతను విపరీతంగా ఆకట్టుకుంది. ఈ సినిమాను తెలుగులోకి డబ్ చేసి విడుదల చేస్తున్నారు నిర్మాత దిల్ రాజు. ఈ సినిమా ఆడియో విడుదల కార్యక్రమాన్ని శుక్రవారం రాత్రి హైదరాబాద్‌లో నిర్వహించారు.
ఈ కార్యక్రమంలో హీరోహీరోయిన్లు ప్రదీప్ రంగనాథన్, ఇవానా, నటి రాధికా శరత్‌కుమార్, నిర్మాత దిల్ రాజు, దర్శకులు అనిల్ రావిపూడి, వంశీ పైడిపల్లి తదితరులు పాల్గొన్నారు. ఈ సందర్భంగా రాధిక మాట్లాడుతూ.. షాకింగ్ కామెంట్స్ చేశారు. అది మూవీకి సంబంధించిన విషయమే అయినప్పటికీ.. ఆడియెన్స్ లో మగాళ్లందరూ ఒక్కసారి ఆశ్చర్యపోయారు. పాత సినిమాల్లో చూస్తే ఒకరినొకరు ప్రేమించుకుంటారు. నువ్వు నా జీవితం అని చెబుతారు. శోభన్ బాబు, కృష్ణ సినిమాల్లో ఇద్దరేసి భార్యలు ఉంటారు. ఇద్దరూ భర్త కోసం పూజాలు చేస్తారు. మీలాంటి భర్త దొరకడం అదృష్టమండి అంటారు. ఇప్పుడు అదంతా అబద్ధం అయిపోయింది. ఇప్పుడు ప్రేమలు మారిపోయాయి.
నిజంగా ఇక్కడ ఎవరైనా మగాడు ఉంటే.. నాకు ఒక్కరే అని చెప్పండి అని చెప్పిన రాధిక.. ఫన్నీగా సవాలు విసిరారు. వెంటనే రెస్పాండ్ అయిన డైరెక్టర్ అనిల్ రావిపూడి.. నాకు ఒక్కరే అని సమాధానమిచ్చారు. ఒక్కరే.. సైడ్ లో ఇద్దరు అని రాధిక పంచ్ వేశారు. ఒకరిని ప్రేమిస్తూ, మరొకరి గురించి అస్సలు ఆలోచించడం లేదు అనేవాళ్లు ఇప్పుడు లేరని, ఒకవేళ ఉన్నామని చెబితే అది అబద్ధమని రాధిక అన్నారు. దీంతో రాధిక వ్యాఖ్యలు వైరల్ గా మారాయి. తమిళ్ లో సూపర్ హిట్ అయిన లవ్ టుడే.. పెళ్లికి సిద్ధమైన ప్రేమికులు, ఓ రోజంతా వాళ్ల ఫోన్లు మార్చుకుంటే ఏం జరుగుతుంది అనే కాన్సెప్ట్ తో తీశారు. ఈ మూవీ తెలుగులో నవంబరు 25న రిలీజ్ కానుంది.
