పవన్ కళ్యాణ్.. చిరంజీవి తమ్ముడిగా పరిశ్రమలోకి వచ్చినా ఒక తరుణంలో పవన్ కళ్యాణ్ అన్నయ్యే చిరంజీవి అనిపించుకున్న స్టార్. అతను సాధించిన విజయాలన్నీ ట్రెండ్ సెట్ చేసినవే. ఈ కారణంగానే అతనికి విపరీతమైన ఫ్యాన్ ఫాలోయింగ్ పెరిగింది. ప్రస్తుతం జనసేన పార్టీ పెట్టి రాజకీయాల్లో క్రియాశీలకంగా ఉన్నాడు పవన్ కళ్యాణ్. అయితే ఓ వైపు సినిమాలు చేస్తూనే.. మరోవైపు రాజకీయాల్లో బిజీ అవుతున్నాడు. దీంతో ఆయన మొదలుపెట్టిన కొన్ని ప్రాజెక్టులు అలస్యమవుతున్నాయి.
ముఖ్యంగా క్రిష్ జాగర్లపూడి డైరెక్షన్లో రాబోయే హరిహర వీరమల్లు షూటింగ్ కొవిడ్ సమయంలో మొదలైనా.. ఇంకా పూర్తవలేదు. వాస్తవానికి వకీల్ సాబ్ తరువాత హరిహర వీరమల్లు సినిమా రావాల్సింది. కానీ కొన్ని కారణాల వల్ల నిర్మాణ పనులు ఆగిపోయాయి. ఈ సినిమా తరువాత ప్రారంభించిన భీమ్లానాయక్ థియేటర్లోకి వచ్చి సందడి చేసింది. ప్రస్తుతం పవన్ హరిహర వీరమల్లుతో పాటు హరిశంకర్ డైరెక్షన్ లో భవదీయుడు భగత్ సింగ్ సినిమాకు ఓకే చెప్పిన విషయం తెలిసిందే. అయితే హరిహర వీరమల్లు సినిమా ఆలస్యమైనా హరిశంకర్ సినిమా కంప్లీట్ చేద్దామనుకున్నారు.
కానీ ఆ డైరెక్టర్ స్టోరీ విషయంలో తాత్సారం చేయడంతో ప్రస్తుతం పవన్ రాజకీయాలకే పరిమితం అవుతున్నాడు. దీంతో పవన్ సినిమా కోసం ఎదురుచూస్తున్న ఫ్యాన్స్ కి నిరాశే మిగిలింది. ఈ నేపథ్యంలో పవన్ కల్యాణ్ ఓ సంచలన నిర్ణయం తీసుకున్నాడు. ఓ వైపు రాజకీయాల్లో కొనసాగుతూనే ముందుగా హరిహర వీరమల్లు సినిమా పూర్తి చేయాలని డిసైడ్ అయ్యారట. ఈ సినిమా పూర్తయిన తరువాతే మిగతా ప్రాజెక్టుల జోలికి వెళ్లాలని అనుకుంటున్నారట. అలాగే ఎలక్షన్స్ దగ్గర పడుతుండడంతో ఆ తర్వాత ఎలాంటి ప్రాజెక్టులు లేకపోతే మొత్తంగా రాజకీయాల్లోకి వెళ్లే అవకాశం ఉందని అంటున్నారు.
