Rahul Gandhi : నిత్యం దేశ రాజకీయాల్లో తలమునకలై ఉండే రాహుల్ గాంధీ, సోనియా గాంధీ న్యూ ఇయ‌ర్ స‌మయంలో కాస్త రిలాక్స్‌డ్‌గా క‌నిపించారు. కొత్త సంవ‌త్సరం సంద‌ర్భంగా వీరిద్దరూ తయారు చేసిన ‘ఆరెంజ్ మార్మలాడ్’ రెసీపీ వీడియో సోషల్ మీడియాలో వైరల్ అవుతోంది. ఆ ఆసక్తికరమైన రెసిపీ గురించి.. వారిద్దరు ఇది తయారు చేయడం వెనుక విశేషం ఉంది.ఆరెంజ్ మార్మలాడ్’ రెసిపీ గురించి చాలామందికి తెలిసే ఉంటుంది. ఈ రెసిపీని సోనియా గాంధీ, రాహుల్ గాంధీ స్వయంగా ప్రిపేర్ చేయడం విశేషం. ఇంట్లో ఫ్రెష్‌గా పండిన నారింజ పండ్లతో ఈ రెసిపీని తయారు చేశారు.
నిజానికి ఈ రెసిపీ రాహుల్ గాంధీ సోదరి ప్రియాంక వాద్రా నుండి నేర్చుకున్నారట. రాహుల్ గాంధీ తన సొంత యూట్యూబ్ ఛానెల్‌లో ఈ రెసిపీ తయారు చేస్తున్న 5 నిముషాల వీడియోను అప్ లోడ్ చేశారు.వీడియోలో సోనియా, రాహుల్ గార్డెన్‌లోని నారింజ పండ్లు తెంపడానికి బాస్కెట్‌తో వెళ్తూ కనిపిస్తారు. బుట్టలోకి తెచ్చిన పండ్లను కిచెన్‌లో క్లీన్ చేసి ఆరెంజ్ మార్మలాడ్ రెసిపీ తయారు చేయడానికి రెడీ అయ్యారు. కిచెన్‌లో ఇద్దరి మధ్య జరిగిన సంభాషణలో సోనియా తనకు భారతీయ వంటకాలు నేర్చుకోవడానికి చాలా సమయం పట్టిందని.. ముఖ్యంగా కారం తినడానికి చాలా సమయం పట్టిందని చెప్పుకొచ్చింది.
ఇక ఆ త‌ర్వాత జరిగిన సంభాషణలో రాహుల్ మాట్లాడుతూ.. ‘బీజేపీ వాళ్లు ఈ జామ్ అడిగితే వాళ్లకి ఇద్దామా మమ్మీ?’ అని అడిగారు. అందుకు సోనియా ‘వాళ్లు మన మీద విసురుతారు’ అనగానే ఇద్దరు గట్టిగా నవ్వుకున్నారు. రెసిపీ తయారు చేయడం పూర్తి కాగానే దానిని గాజు సీసాల్లోకి నింపుతారు. ‘ప్రేమతో సోనియా, రాహుల్’ అనే బ్రౌన్ పేపర్ మీద రాసిన మెసేజ్‌ను ఆ సీసాలకు అతికించారు. వీడియో మొత్తం కాంగ్రెస్ భారత్ జోడో యాత్ర క్యాంపెయిన్ లోగో కనిపిస్తుంది. ఇక ఈ వీడియో సోషల్ మీడియాలో బాగా వైరల్ కాగా, త‌ల్లి కొడుకులు ఇద్దరు కూడా ఇంత సింపుల్‌గా, ప్రేమ‌గా క‌నిపించే స‌రికి ప్ర‌తి ఒక్క‌రు మురిసిపోతున్నారు.
