YS Sharmila : మ‌రి కొద్ది రోజులలో షర్మిల త‌న‌యుడు పెళ్లి పీట‌లు ఎక్క‌నున్న విషయం తెలిసిందే. అయితే గ‌త కొద్ది రోజులుగా ఆమె పెళ్లి ఏర్పాట్ల‌లో బిజీగా ఉంది. వైఎస్సార్ తెలంగాణ పార్టీ అధ్యక్షురాలు వైఎస్ షర్మిల తన కుటుంబసభ్యులతో కలిసి ఇడుపులపాయకు రీసెంట్‌గా వెళ్లారు. కుమారుడు రాజారెడ్డి, కాబోయే కోడలు ప్రియా అట్లూరితో కలిసి వైఎస్సార్ సమాధి వద్ద ప్రత్యేక ప్రార్థనలు చేశారు. వారి వివాహ మొదటి పత్రికను వైఎస్సార్ సమాధి వద్ద ఉంచి ఆశీస్సులు తీసుకున్నట్లు షర్మిల తెలిపారు. షర్మిల తల్లి విజయమ్మ, కుమార్తె అంజలి రెడ్డి, ఇతర బంధువులు ఈ ప్రార్థనల్లో పాల్గొన్నారు.
కాంగ్రెస్ పార్టీలో వైఎస్సార్‌టీపీ విలీనం గురించి స్పందిస్తూ.. తమ పార్టీతో పొత్తు పెట్టుకోవడం వల్లే తెలంగాణలో కాంగ్రెస్ అధికారంలోకి వచ్చిందని షర్మిల అన్నారు. తాను కాంగ్రెస్‌తో కలవడానికి సిద్ధంగా ఉన్నానని తేల్చి చెప్పేశారు. దీంతో ఇన్ని రోజులుగా నెలకొన్న సస్పెన్స్‌కు తెరపడినట్లయ్యింది. ఇడుపుల పాయలోనే షర్మిల బస చేయగా, ఆ తర్వాత మిగిలిన పెళ్లి పనులను ఘనంగా నిర్వహించేందుకు ఏర్పాట్లు చేయనున్నట్లు తెలుస్తోంది. వ్యాపార, రాజకీయ రంగాల్లో ఆరితేరిన అట్లూరి కుటుంబంతో షర్మిల వియ్యం అందుకోనున్నారు. ఇక వైఎస్ షర్మిల ఇవాళ మధ్యాహ్నం ప్రత్యేక విమానంలో గన్నవరం వెళ్లనున్నారు. అక్కడ నుంచి తాడేపల్లిలోని సీఎం నివాసానికి చేరుకోనున్నారు. కుమారుడు రాజారెడ్డి వివాహ ఆహ్వాన పత్రికను సోదరుడికి అందజేయనున్నట్లు తెలుస్తోంది. అనంతరం సాయంత్రం విజయవాడ నుంచి షర్మిల ఢిల్లీకి బయల్దేరి వెళ్లనున్నట్లు సమాచారం.
షర్మిల కుమారుడు రాజారెడ్డికి వివాహం నిశ్చయమైన విషయం తెలిసిందే. ఫిబ్రవరి 17వ తేదీన అట్లూరి ప్రియతో కుమారుడి వివాహం నిశ్చయించినట్లు షర్మిల స్వయంగా సోషల్‌ మీడియా ద్వారా ప్రకటించారు. ఈ నేపథ్యంలో జనవరి 18వ తేదీన వీరి నిశ్చితార్థ వేడుకను నిర్వహించనున్నట్లు వెల్లడించారు. ఇదిలా ఉండగా.. షర్మిల కాంగ్రెస్ పార్టీలో చేరికకు ముహూర్తం ఖరారైన విషయం తెలిసిందే. ఈనెల 4న పార్టీ అగ్రనేతలు సోనియా గాంధీ, రాహుల్‌ గాంధీ, ఏఐసీసీ అధ్యక్షుడు మల్లికార్జున ఖర్గే ఆధ్వర్యంలో కాంగ్రెస్‌లో చేరనున్నారు. ఆమెతోపాటు మరో 40 మంది కూడా కాంగ్రెస్ కండువా కప్పుకోనున్నట్లు తెలుస్తోంది. షర్మిలకు ఆంధ్రప్రదేశ్‌ రాష్ట్ర పార్టీ పగ్గాలు అప్పగించాలని కాంగ్రెస్ పెద్దలు నిర్ణయించినట్లు తెలుస్తోంది.
