Pawan Kalyan : రాజమండ్రిలో టీడీపీ-జనసేన సమన్వయ కమిటీ సమావేశం జరిగింది. దీనికి జనసేన చీఫ్ పవన్ కల్యాణ్, టీడీపీ జాతీయ కార్యదర్శి నారా లోకేష్‌తో పాటు రెండు పార్టీలకు చెందిన మరో 14మంది నేతలు ఈ సమావేశంలో పాల్గొన‌డం జరిగింది. చంద్రబాబు అక్రమ అరెస్ట్‌తో పాటు వైసీపీ అరాచక పాలన నుంచి రాష్ట్రాన్ని కాపాడటం, రాష్ట్రంలోని అన్నీ వర్గాలు అభివృద్ది చెందాలనే మూడు తీర్మానాలను ఈ సమావేశంలో ప్రవేశ‌పెట్టారు. అలాగే జనసేన, టీడీపీ కలిసి ఉమ్మడిగా చేపట్టబోయే భవిష్యత్ కార్యక్రమాలపై ఉమ్మడి కార్యాచరణను, ప్రణాళికను రూపొందించాలని నిర్ణయించినట్లుగా లోకేష్, పవన్ కల్యాణ్ చెప్పుకొచ్చారుఏపీ స్కిల్ స్కాంలో చంద్రబాబు అరెస్టు నేపథ్యంలో రాజమండ్రి జైలుకు వెళ్లి ఆయన్ను పరామర్శించిన తర్వాత టీడీపీ-జనసేన పొత్తుపై ప్రకటన చేసిన పవన్ కళ్యాణ్.. ఇవాళ తొలిసారి ఉమ్మడి కమిటీ భేటీకి హాజరయ్యారు.
ఇవాళ్టి భేటీకి హాజరైన సందర్భంగా నారా లోకేష్ ఆయనకు టీడీపీ సభ్యుల్ని పరిచయం చేశారు. అలాగే నారా లోకేష్ కూడా స్వయంగా వెళ్లి జనసేన తరఫున కమిటీలో ఉన్న సభ్యుల్ని పరిచయం చేసుకున్నారు. అనంతరం ఇరుపక్షాలు చర్చలు ప్రారంభించాయి. ఇవాళ్టి భేటీలో జనసేన, టీడీపీ ఇరు పార్టీలూ వచ్చే ఎన్నికల్లో పోటీకి సంబంధించి తమవైపు నుంచి ప్రతిపాదనల్ని పరస్పరం పంచుకున్నట్లు తెలుస్తోంది. ఇప్పటికే జనసేనకు టీడీపీ ఈసారి తక్కువ సీట్లు ఆఫర్ చేస్తోందని, జనసేనను అస్సలు పట్టించుకోవడం లేదని వైసీపీ ప్రచారం చేస్తున్న నేపథ్యంలో ఇవాళ జనసేన తరఫున ఇచ్చిన ప్రతిపాదనలు వీరి పొత్తుకు కీలకంగా మారాయి.
రాష్ట్రంలో వైసీపీ ప్రభుత్వం పోవాలి..రాష్ట్రంలో జనసేన-టీడీపీ ప్రభుత్వం రావాలన్న ప్రధాన అజెండాతోనే నేటి సమావేశం జరిగిందన్నారు పవన్ కల్యాణ్. ఏపీలో 14ఏళ్ల బాలుడ్ని చంపిన వ్యక్తికి బెయిల్ వచ్చింది… కానిఅక్రమంగా అరెస్ట్ చేసిన 73ఏళ్ల సీనియర్ రాజకీయ నాయకుడికి బెయిల్ రాకుండా ప్రభుత్వం టెక్నికల్‌గా అడ్డుపడుతోందని జనసేన పవన్ కల్యాణ్ అన్నారు. రాజమండ్రిలో టీడీపీ- జనసేన సమన్వయ కమిటీ సమావేశ అనంతరం మీడియాతో మాట్లాడిన పవన్ కల్యాణ్ ..అక్రమంగా, అన్యాయంగా అరెస్ట్ చేసి జైలులో పెట్టిన చంద్రబాబులో విశ్వాసం పెంచాలనే ఈ సమావేశాన్ని రాజమండ్రిలో ఏర్పాటు చేసుకున్నట్లుగా తెలిపారు. అందుకే రాజమండ్రి నుంచి ఉమ్మడి కార్యాచరణతో పాటు భవిష్యత్ పోరాటం, ప్రణాళికను రూపొందిస్తామన్నారు. ప్రభుత్వం వచ్చాక రాజ‌మండ్రిలోనే తొలి బ‌హిరంగ స‌భ ఏర్పాటు చేస్తామ‌ని స్ప‌ష్టం చేశారు.
