Balakrishna In IPL : హీరోగా నటిస్తూ కోట్లాది మంది అభిమానులను సంపాదించుకున్న బాలయ్య.. ఈమధ్య ‘అన్‌స్టాపబుల్’ టాక్ షోకు వ్యాఖ్యాతగా మారి తనలోని కొత్త కోణాన్ని బ‌య‌ట‌పెట్టిన విష‌యం తెల‌సిందే. న‌టుడిగా, వ్యాఖ్యాతగా అద‌ర‌గొట్టిన బాలకృష్ణ ఇప్పుడు ఐపీఎల్‌కు కామెంటేటర్గా మారి కొత్త అనుభూతిని ఇవ్వబోతున్నారు. ఇప్పుడు క్రికెట్ అభిమానులు ఐపీఎల్ కోసం ఎంత ఆసక్తిగా ఎదురుచూస్తున్నారో ప్ర‌త్యేకంగా చెప్ప‌న‌క్క‌ర్లేదు. మార్చి 31వ తేదీ నుంచి ఐపీఎల్ 2023 షురూ కానుంది. తొలి మ్యాచ్ గుజరాత్ టైటాన్స్, చెన్నై సూపర్ కింగ్స్ జట్ల మధ్య అహ్మదాబాద్‌లో జరగనుంది.
ఈ మ్యాచ్‌కు నటసింహా నందమూరి బాలకృష్ణ కామెంటేటర్గా వ్యవహరించబోతున్నారు. ఐపీఎల్ ప్రారంభోత్సవం రోజున స్టార్ స్పోర్ట్స్ తెలుగు కామెంట్రీ బాక్సులో ఎమ్మెస్కే ప్రసాద్, వేణుగోపాలరావుతో కలిసి బాలకృష్ణ కూర్చోనున్నారు. ఈ మేరకు స్టార్ స్పోర్ట్స్ తెలుగు.. బాలయ్యతో ఒప్పందం చేసుకుంది. ఐపీఎల్ 2023 ప్రచారం కోసం నందమూరి బాలకృష్ణ తమతో చేతులు కలిపినట్టు స్టార్ స్పోర్ట్స్ తెలుగు ట్విట్టర్ ద్వారా ప్రకటించింది. బాలకృష్ణ సినిమా షూటింగ్ జరుగుతున్న చోటికే వెళ్లి ఆయనతో ఈ వీడియో చేసినట్టు అర్థం అవుతుంది. బాలకృష్ణను ఆహ్వానిస్తూ ఎమ్మెస్కే ప్రసాద్, వేణుగోపాలరావు ఆయనకు బ్యాట్ అందజేశారు.
ఐపీఎల్ 2023 కోసం స్టార్ స్పోర్ట్స్ తెలుగుతో జాయిన్ అవ్వడం చాలా ఆనందంగా ఉంది. నా ప్రేక్షకులు నన్ను నటనలో కాదు ఆటలో కూడా చూడబోతున్నారు. నాకు ఈ ఆట అంటే మొదటి నుంచీ, స్కూల్ రోజుల నుంచీ మక్కువ ఎక్కువ. మళ్లీ ఇప్పుడు ఈ ఆటకు నేను కామెంటేటర్గా రావడం అన్నది నాకు ఆట ఆడుతున్నంత అనుభూతిని, సంతృప్తిని ఇస్తుందని నేను ఆశిస్తున్నాను అని బాలకృష్ణ చెప్పుకొచ్చారు. బాలయ్య కామెంట్రీ కోసం అభిమానులు క‌ళ్ల‌ల్లో ఒత్త‌లు వేసుకొని మ‌రీ ఎదురు చూస్తున్నారు.
