Rana Naidu : వెంకటేశ్‌, రానా దగ్గుబాటి కలిసి తొలిసారి నటించిన వెబ్‌సిరీస్‌ ‘రానా నాయుడు’. మార్చి 10న నెట్‌ఫ్లిక్స్‌ ఓటీటీ వేదికగా ప్రేక్షకుల ముందుకొచ్చింది. ఎన్నో అంచనాల మధ్య విడుదలైన ఈ సిరీస్ మొద‌ట పాజిటివ్ టాక్ తెచ్చుకున్న‌ప్ప‌టికీ, ఇప్పుడు మాత్రం విమ‌ర్శ‌ల పాల‌వుతుంది.ఇప్పటివరకు ఫ్యామిలీ హీరోగా పేరున్న వెంకటేశ్‌ ఇందులో యథేచ్చగా బూతులు మాట్లాడడం కొందరికి నచ్చడం లేదు. దీంతో రామానాయుడుపై నెట్టింట భారీగా ట్రోల్స్ జ‌రుగుతుంది. టాక్ ఎలా ఉన్నప్పటికీ విడుదలైన రెండు రోజుల్లోనే నెట్‌ఫ్లిక్స్‌ టాప్‌ ట్రెండింగ్‌ లిస్ట్‌లోకి రామానాయుడు చేరింది. భారత్‌ టాప్‌ ట్రెండింగ్‌ షోల్లో ‘రానా నాయుడు’ సిరీస్ ఫస్ట్‌ ప్లేస్‌లో ఉన్నట్లు పేర్కొంది.
ఈ విషయాన్ని సోషల్‌ మీడియా వేదికగా తెలిపింది నెట్‌ఫ్లిక్స్‌. దీనిపై స్పందించిన రానా.. ‘రానా నాయుడు సిరీస్ ను విమర్శిస్తున్న, అసహ్యించుకుంటున్న వారికి క్షమాపణలు చెప్పారు. అదే సమయంలో తమ సిరీస్ కు ఇంతటి ఆదరణ అందించిన ప్రేక్షకులకు ధన్యవాదాలు తెలిపాడు. సిరీస్‌ను కుటుంబంతో కాకుండా ప్రతి ఒక్కరూ ఒంటరిగా చూడాలని ఆయన స్పష్టం చేశారు. ఈ సిరీస్‌కు ఓ వర్గం ప్రేక్షకులు నుంచి మిశ్రమ స్పందన వచ్చినా.. నెట్‌ఫ్లిక్స్‌ మాత్రం సిరీస్ ట్రెండింగ్‌లోఉండ‌డం గ‌మ‌న‌ర్హం. సుప్రన్‌ వర్మ, కరణ్‌ అన్షుమన్‌ దర్శకత్వం వహించారు.
రానా నాయుడు సిరీస్ మొత్తంలో ఊహించని స్థాయిలో బూతు పదాలు వాడారని, 18 ఏండ్లు పైబడిన వారే చూడాలంటూ సిరీస్ చూసిన వారు కూడా అభిప్రాయపడుతున్నారు. అంత‌క‌ముందు ప్రీమియర్‌ షో సమయంలో మాట్లాడిన వెంకటేశ్‌.. ‘ మీ ఇంట్లో ల్యాప్‌ ట్యాప్ లు, ఫోన్లలో దీన్ని చూస్తుంటే మీ ఫేస్ లో ఎక్స్ ప్రెషన్లు పూర్తిగా మారిపోతుంటాయి. ఎందుకంటే ఇందులో కామెడీ, హింస, సెక్స్ కూడా ఉన్నాయి’ అని చెప్పారు. ఇలా చెప్పినప్పటికీ ఈ రేంజ్‌లో అడల్డ్‌ కంటెంట్‌ ఉంటుందని జనాలు ఊహించలేకపోయారు. ప్ర‌స్తుతానికి రానా నాయుడిపై జోరుగా విమ‌ర్శ‌లు వెల్లువెత్తుతున్నాయి.
