Amala : తెలుగు రాష్ట్రాల‌లో డాగ్ టెర్ర‌ర్ మొద‌లైంది. ఏపీ,తెలంగాణల్లో వీధికుక్కలు స్వైరవిహారం చేస్తున్నాయి. ఓ వైపు మున్సిపాల్టీ సిబ్బంది చర్యలు కొనసాగుతుండగానే.. మరోవైపు గ్రామసింహాలు పిల్లలను టార్గెట్‌ చేసి గాయపరుస్తుండ‌డం మ‌నం చూస్తూనే ఉన్నాం.. మొన్న ప్రదీప్‌, నిన్న ఆశ్రిత్, ఆ త‌ర్వాత శైలజ్‌, సహస్రల ఉదంతంతో జనం భయాందోళనకు గురవుతున్నారు. అయితే ఈ క్ర‌మంలో వీధి కుక్కల నియంత్రణ చేయాల‌ని కొంద‌రు మండిప‌డుతుండ‌గా, వాటికి జంతు ప్రేమికులు అడ్డుగా నిలుస్తున్నారు. ఏమాత్రం చర్యలు తీసుకున్నా కోర్టు డైరెక్షన్‌తో బెదిరింపులకు పాల్పడుతున్నారు. ఐతే కుక్కలపై ప్రేమ తప్ప పిల్లలపై ప్రేమ ఉండదా అని బాధితులు ప్రశ్నిస్తున్నారు.
బాలుడు మృతి చెందిన ఘటనను వివాదాస్పద దర్శకుడు రాంగోపాల్ వర్మ.. విడిచిపెట్టడం లేదు. ఆ ఘటన జరిగిన రోజు నుంచి.. అటు అధికారులపై తీవ్ర స్థాయిలో విరుచుకుపడుతూ.. వరుస ట్వీట్లు చేస్తూనే ఉన్నాడు. నిర్లక్ష్యంగా సమాధానం చెప్పిన హైదరాబాద్ మేయర్ గద్వాల విజయలక్ష్మీని కూడా తన ట్వీట్లతో కడిగిపారేశాడు. బాధిత కుటుంబానికి న్యాయం చేయాలంటూ.. తనదైన స్టైల్‌లో ప్రభుత్వాన్ని డిమాండ్ చేశాడు. మరోవైపు ర‌ష్మీ, అమల వంటి జంతు ప్రేమికులు మాత్రం వీధి కుక్కలపై ఆగ్ర‌హం చూపించొద్ద‌ని కోరుతున్నారు.
ర‌ష్మీపై మొన్న వీధి కుక్క‌ల‌కి పాజిటివ్‌గా ట్వీట్ చేయ‌గా, ఆమెపై నెటిజన్స్ విరుచుకుప‌డ్డారు. తాజాగా బ్లూ క్రాస్ సోసైటీ ఆఫ్ హైదరాబాద్ నిర్వాహకులు రాలు అక్కినేని అమల స్పందిస్తూ.. కుక్కల దాడితో బాలుడు మరణించడం చాలా బాధాకరం. అలాగని మొత్తం కుక్కలపై కోపం, ద్వేషం పెంచుకోవడం సరికాదని , వాటిని ఎంతగా ప్రేమిస్తే అవి కూడా తిరిగి ప్రేమిస్తాయని అన్నారు. ప్రస్తుతం కుక్కలన్నింటినీ పారద్రోలినా మళ్లీ జనావాసంలోకి వచ్చే అవకాశం ఉందని, మానవులకు వాటికి మధ్య వేల ఏండ్లనాటి అనుబంధం ఉందని చెప్పింది. నాలుగేళ్ల బాలుడి విష‌యంలో జరిగిన అన్యాయం ప‌ట్ల అమల ఇలా స్పందించ‌డంపై నెటిజన్స్ ఆగ్ర‌హం వ్య‌క్తం చేస్తున్నారు. మీ ఇంట్లోనే ఇలా జ‌రిగి ఉంటే ఊరుకునే వారా అంటూ మండిప‌డుతున్నారు.
