Team India : వరల్డ్ కప్ 2023లో భారత్ ఎలాంటి ప్రదర్శన చేసింతో మనం చూశాం. వారి ప్ర‌ద‌ర్శ‌నకి యావ‌త్ ప్ర‌పంచం ఆశ్చర్య‌పోతుంది. ఒక్క ఓట‌మి లేకుండా భారత్ ఫైనల్ వరకు వెళ్లింది. ఇక మన దాయాది పాకిస్థాన్ ఎలాంటి ఆటతీరు కనబర్చిందో అందరికీ తెలిసిందే. వరల్డ్ కప్‌లో తొలి రెండు మ్యాచ్‌ల్లో గెలిచిన పాకిస్థాన్ ఆ తర్వాత వరుసగా నాలుగు మ్యాచ్‌ల్లో ఓడింది. తర్వాతి మూడు మ్యాచ్‌లకు గానూ రెండింట్లో గెలిచి చివరి మ్యాచ్‌లో ఇంగ్లాండ్ చేతిలో ఓడింది. ఇంగ్లాండ్‌పై భారీ తేడాతో గెలిచి సెమీస్ చేరతామని ప్రగల్భాలు పలికిన పాక్.. చివరకు బొక్కబోర్లాపడి లీగ్ దశలోనే ఇంటి ముఖం పట్టింది.
అయితే న్యూజిలాండ్‌పై గెలిచి సెమీస్ చేరుకున్న టీమిండియాపై పాక్ ఆట‌గాళ్లు ప్ర‌శంస‌లు కురిపిస్తున్నారు. పాకిస్థాన్ మాజీ పేస్ బౌలర్ షోయబ్ అక్తర్… ఫైనల్ చేరడానికి ఇండియాకు పూర్తి అర్హత ఉందని, ఈ క్రెడిట్ అంతా రోహిత్ శర్మదే అని అక్తర్ అన్నాడు. ఇండియా మరోసారి న్యూజిలాండ్ ను నిర్దాక్షిణ్యంగా ఓడించింది. ఇండియాకు ఫైనల్ చేరడానికి పూర్తి అర్హత ఉంది. ఆ టీమ్ కాకపోతే మరే టీమ్ ఫైనల్ వెళ్తుంది? క్రెడిట్ అంతా రోహిత్ శర్మకే దక్కుతుంది. కెప్టెన్ గా, ప్లేయర్ గా, బ్యాట్స్‌మన్ గా క్రెడిట్ మొత్తం రోహిత్ కే వెళ్తుంది. బౌలర్లపై విరుచుకుపడి వాళ్లను కొట్టి కొట్టి గాలి తీసేస్తాడు అని అన్నాడు. విరాట్ కూడా చాలా అద్భుత‌మైన ఆటతీరు క‌న‌బ‌రచి స‌రికొత్త చరిత్ర సృష్టించాడ‌ని అన్నాడు.
ఇక వసీం అక్ర‌మ్, బాబ‌ర్ ఆజ‌మ్, షాహిద్ ఆఫ్రిది వంటి వారు కూడా భార‌త ఆట‌తీరుపై ప్ర‌శంస‌ల జ‌ల్లు కురిపించారు. మొద‌టి నుండి చ‌క్కని ఆట‌తీరుని ప్ర‌ద‌ర్శిస్తూ ఫైనల్ వరకు వెళ్లారు. క‌లిసిక‌ట్టుగా ఆడుతూ మంచి విజ‌యాల‌ని అందుకుంటున్నారు. విరాట్ 50 సెంచ‌రీలు చేయడం మాములు విష‌యం కాదు. ఆయ‌న కెరీర్‌లో మ‌రెన్నో సాధిస్తాడ‌ని అన్నారు. ఇది ఇలా ఉంటే వరల్డ్ కప్‌లో రోహిత్ శర్మ టాస్ ఫిక్సింగ్ చేస్తున్నాడని పాక్ మాజీ ఆటగాడు సికందర్ బఖ్త్ ఆరోపించాడు. తన ప్రత్యర్థి కెప్టెన్‌కు, ఐసీసీ అధికారులకు దూరంగా రోహిత్ కాయిన్ విసురుతున్నాడని.. ఫలితం ఇండియాకు అనుకూలంగా వస్తోందన్నాడు. అంటే రోహిత్ కాయిన్‌ను కాస్త దూరంగా విసరడం వల్ల.. ప్రత్యర్థి కెప్టెన్‌కు అది బొమ్మ పడిందా, బొరుసు పడిందా అని చెక్ చేయలేడు. కాయిన్ చూసే వ్యక్తిని బీసీసీఐ మేనేజ్‌ చేయడం వల్ల టీమిండియా టాస్ గెలుస్తోందనేది అతగాడి అభిప్రాయం.
