PM Modi : తెలంగాణలో అన్ని పార్టీలు ఎన్నికల ప్రచారం ముమ్మరం చేయ‌డం మ‌నం చూస్తూనే ఉన్నాం. ఇప్పుడు బీజేపీ కూడా ప్ర‌చారంలో ఒక అడుగు వేసింది. నేడు హైదరాబాద్ ఎల్బీ స్టేడియంలో నిర్వహించే బీసీ ఆత్మగౌరవ సభలో మోదీ పాల్గొంటారు. ప్రధానితో పాటు జనసేన అధ్యక్షుడు పవన్ కల్యాణ్ కూడా ఈ సభలో పాల్గొంటారు. ఢిల్లీ నుంచి ప్రత్యేక విమానంలో సాయంత్రం ఐదున్నర గంటలకు ప్రధాని బేగంపేట విమానాశ్రయానికి చేరుకుంటారు. . అక్కడి నుంచి నేరుగా ఎల్బీ స్టేడియం వెళ్లి బహిరంగ సభకు హాజరవుతారు. సభ ముగిసిన తర్వాత తిరిగి ఢిల్లీ వెళ్లిపోతారు.
అయితే ఇదిలా ఉంటే తెలంగాణ అసెంబ్లీ ఎన్నికల్లో బీజేపీ-జనసేన మధ్య పొత్తు ఖరారైంది. జనసేనకు 8 సీట్లు ఇచ్చేందుకు బీజేపీ అధిష్టానం అంగీకరించింది. ఉమ్మడి ఖమ్మం జిల్లాలో ఖమ్మం, అశ్వరావుపేట, వైరా, కొత్తగూడెం సీట్లను జనసేనకు కేటాయించనున్నారు. నాగర్ కర్నూల్, కోదాడ, కూకట్ పల్లి, తాండూర్ స్థానాలను కూడా జనసేనకే కేటాయించాలని బీజేపీ హైకమాండ్ నిర్ణయించింది.అనేక తర్జనభర్జనల మధ్య చివరకు బీజేపీ జనసేనకు కేటాయించే సీట్లను ప్రకటించింది. అయితే రెండు పార్టీల నుంచి పొత్తులు, సీట్లపై అధికారికంగా ప్రకటన వెలువడాల్సి ఉంది. 32 స్థానాలు జనసేన ఆశిస్తే బీజేపీ కేవ‌లం 8 ఇవ్వడంపై జనసేన నాయ‌కులు అసంతృప్తిగా ఉన్నారు.
మ‌రోవైపు పవన్ క‌ళ్యాణ్ తెలంగాణ రాజ‌కీయాల‌లో పెద్ద‌గా యాక్టివ్‌గా లేరు. ఇక్కడ వారాహి యాత్ర కాని, స‌భ‌లు కాని పెట్టింది లేదు. తెలంగాణ స‌ర్వేల‌లో జనసేన పేరు ఎక్క‌డ కూడా క‌నిపించ‌డం లేదు. పవన్ ఫేమ్‌ని వాడుకోవాల‌ని బీజేపీ చూస్తుంది . పవన్ క‌ళ్యాణ్ ఆంద్రా మ్యాప్ అడిగితే, బీజేపీ తెలంగాణ మ్యాప్ పెట్టింద‌నే టాక్ వినిపిస్తుంది. మ‌రి రానున్న రోజుల‌లో పవన్ క‌ళ్యాణ్‌కి బీజేపీ పెద్ద షాక్ ఇవ్వ‌బోతుందని విశ్లేష‌కులు చెప్పుకొస్తున్నారు. మ‌రోవైపు జ‌న‌సైనికులు కూడా బీజేపీ తీరుపై అసంతృప్తిగా ఉన్నారు.
