YSRCP : ఏపీ సంక్షేమ ప్రభుత్వం లోక్ సభ ఎన్నిక‌లలో ఎన్ని సీట్లు సాధించుకుంటుంది, ఏ కూటమి పరిస్థితి ఏంటి? ఈటీజీ టైమ్స్ నౌ సర్వే చాలారోజులుగా నిర్వహిస్తున్నారు. ఈ క్ర‌మంలో తాజాగా ఫేజ్ 3 ఫలితాలను వెల్లడించారు. ఈ ఫలితాల్లో ఆంధ్రప్రదేశ్ లో వైఎస్సార్ సీపీ ప్రభంజనం సృష్టించింది. ఆంధ్రప్రదేశ్ లో ఉన్న 25 లోక్ సభ స్థానాలను వైసీపీ గెలుచుకునే అవకాశం ఉందంటూ ఈటీజీ టైమ్స్ నౌ సర్వేలో వెల్లడించారు. 25 స్థానాల్లో వైసీపీకి 24 నుంచి 25 సీట్లు, తెలుగుదేశం పార్టీకి 0 నుంచి 1 సీటు, జనసేన ప్రభావం ఉండబోదని వారు చెప్పుకొచ్చారు.
ఓటింగ్ పర్సంటేజ్ క‌నుక చూస్తే.. వైసీపీకి 51.30 శాతం, తెలుగుదేశానికి 36.20, జనసేనకు 10.10 శాతం ఓట్లు, ఎన్డీఏకి 1.30 శాతం, ఇతరులకు 1.10 శాతం ఓట్లు వచ్చే అవకాశం ఉందని వారు స్ప‌ష్టం చేశారు. బీఆర్ఎస్ పార్టీ విషయానికి వస్తే 9 నుంచి 11 లోక్ సభ స్థానాలు దక్కే అవకాశం ఉందని వెల్లడించారు. దేశవ్యాప్తంగా ఉన్న కూటముల విషయానికి వస్తే.. ఎన్డీఏ కూటమికి 296 నుంచి 326 సీట్లు, ప్రతిపక్ష I.N.D.I.A. కూటమికి 160 నుంచి 190 సీట్లు, బీజేడీకి 12 నుంచి 14 లోక్ సభ స్థానాలు, ఇతరులకు 11 నుంచి 14 స్థానాలు దక్కే అవకాశం ఉన్నట్లుగా చెప్పుకొచ్చారు. ఈ సర్వే ఫలితాలపై వైసీపీ శ్రేణులు ఆనందం వ్యక్తం చేస్తున్నారు.
వైఎస్ జగన్ అందిస్తున్న సంక్షేమ పథకాలు, ప్రజల ఆదరణ ఎంత‌గా ఉందనేది ఈ సర్వే తెలియ‌జేస్తుంద‌ని నాయ‌కులు కూడా హ‌ర్షం వ్యక్తం చేస్తున్నారు. ప్రభుత్వం పై బురద జల్లే వాళ్లకు ఈటీజీ టైమ్స్ నౌ సర్వే ఒక చెంప పెట్టు లాంటిదని వైసీపీ శ్రేణులు అంటున్నారు.అయితే 2019 ఎన్నికలతో పోలిస్తే వైసీపీ మరింత బలపడిందని ఈ సర్వే చెప్పుకొస్తుండ‌గా, ఇది ఎంత‌వ‌ర‌కు నిజం అవుతుంద‌నేది చూడాల్సి ఉంది. 2019లో 25 ఎంపీ స్థానాలకి గాను 22 స్థానాలు దక్కించుకోగా.. ఈసారి 25 స్థానాలు దక్కించుకునే అవకాశం ఉందని చెప్పారు. ఇక గత ఎన్నికల్లో 3 ఎంపీ స్థానాలు దక్కించుకున్న తెలుగుదేశం పార్టీకి ఈసారి ఎన్నికల్లో దాదాపుగా ఒక్క సీటు కూడా దక్కే అవకాశం లేదని ఈ సర్వే ప్రకారం రుజువవుతోంది. ప్ర‌స్తుతం ఈ స‌ర్వేపై రాజ‌కీయాల‌లో చ‌ర్చ జోరుగా సాగుతుంది.
