Vanga Geetha : ప‌వ‌న్ క‌ళ్యాణ్‌పై వంగా గీత సంచ‌ల‌న వ్యాఖ్య‌లు.. ఆయ‌న‌వి దింపుడు క‌ళ్లెం ఆశ‌లు అంటూ ఫైర్..

Vanga Geetha : ఎన్నికల వేళ పిఠాపురం రాజకీయం ఆసక్తి కరంగా మారుతోంది. పవన్ కల్యాణ్ పోటీ చేస్తున్న నియోజకవర్గం పిఠాపురం కావటంతో వైసీపీ ప్రత్యేకంగా ఫోకస్ చేసింది. తాను పిఠాపురం నుంచి గెలవటం ఖాయం అని ధీమా వ్యక్తం చేసారు. వంగా గీత గతంలో పీఆర్పీ నుంచి గెలిచారని..గీత కూడా జనసేనలోకి రావాలని ఆహ్వానించారు. ఈ ఎన్నికలు అయిపోయాక వంగా గీత జనసేన పార్టీలోకి వస్తారని వ్యాఖ్యానించారు. ఆమెను రాజకీయాల్లోకి తీసుకువచ్చిందే తామని అన్నారు. పిఠాపురంలో తన ఓటమి కోసం మంత్రి పెద్దిరెడ్డి గారి అబ్బాయి మిథున్ రెడ్డిని రంగంలో దించారని, ఓటుకు రూ.10 వేలు, కుటుంబానికి లక్ష ఇస్తున్నట్టు తెలుస్తోందని వివరించారు. ఎవరెన్ని చేసినా పిఠాపురంలో తన గెలుపును అడ్డుకోలేరని పవన్ కల్యాణ్ ధీమా వ్యక్తం చేశారు.

ఈ వ్యాఖ్యలపై ఎంపీ వంగా గీత స్పందించారు.ప‌వ‌న్ చెబుతున్నట్టు నేను రాజకీయాల్లోకి వచ్చింది 2009లో కాదని, తాను డిగ్రీ ప్రథమ సంవత్సరం చదువుతున్నప్పటి నుంచే రాజకీయాల్లో ఉన్నానని తెలిపారు. విద్యార్థి రాజకీయ నేతగా ప్రస్థానం ప్రారంభించానని, స్కూలు స్థాయి నుంచే తనకు సేవ అంటే ఇష్టమని, ప్రజల్లో ఉండడం అంటే ఇష్టమని చెప్పారు. స్కూల్లో కూడా చీపురు పట్టుకుని ఊడ్చేదాన్నని వంగా గీత వెల్లడించారు. ఎన్ఎస్ఎస్ లో బెస్ట్ వర్కర్ ని అని, ఎన్సీసీలో బెస్ట్ కేడెట్ ని అని వివరించారు. పవన్ కాపు అయితే తాను కూడా కాపు ఆడపడుచునే అని అన్నారు.

కుల ప్రాతిపదికన రాజకీయాలు చేయకూడదు.ప్రతి వర్గాన్ని అభివృద్ధి చేయాలనేది లెక్కగా ఉండాలి. కాపులంతా 100% నాకు సహకారం అందిస్తారు.నియోజకవర్గంలో అన్ని వర్గాల నుంచి కూడా నాకు మద్దతు లభిస్తుంది అని వంగా గీత స్పష్టం చేశారు. మనిషికి లక్ష ఇస్తున్నారంటూ నిన్న మీటింగ్ లో మాట్లాడారు… ఇప్పటి నుంచే ఎందుకు దింపుడు కళ్లం ఆశలు! పోలింగ్ కు ఇంకా రెండు నెలల సమయం ఉంది. ఈ లోపున చక్కగా ప్రచారం చేసుకోవచ్చు… ఇప్పుడే డబ్బుల గొడవ ఎందుకు? ప్రజలేంటి, వాళ్ల పరిస్థితులేంటి, వాళ్ల ఇబ్బందులేంటి… నియోజకవర్గానికి చేయాల్సిందేమిటి? ఇవి కదా ఆలోచించాలి అని వంగా గీత స్పష్టం చేశారు.