టీమిండియా స్టార్‌ ప్లేయర్‌, మాజీ కెప్టెన్ విరాట్‌ కోహ్లికి చేదు అనుభవం ఎదురైంది. టీ20 వరల్డ్ కప్‌లో భాగంగా ఆస్ట్రేలియాలో విరాట్‌ హోటల్ రూమ్‌కు సంబంధించిన ఓ వీడియో ఇప్పుడు సోషల్ మీడియాలో తెగ వైరల్ అవుతుంది. కోహ్లి రూమ్‌లోకి దూరిన ఓ అభిమాని.. రూమ్ మొత్తం వీడియో తీసి సోషల్ మీడియాలో పోస్ట్ చేశాడు. విరాట్‌ తన వస్తువులను ఎలా జాగ్రత్తగా పెట్టుకున్నాడు, షూ కలెక్షన్స్‌, అతను వాడే వస్తువులు ఇలా ప్రతీది వీడియోలో చూపించారు. చివరకు వాష్‌ రూమ్‌ను సైతం చిత్రీకరించారు. దీనిపై కోహ్లీ స్పందించారు.
ఆ వీడియోను ఇన్‌స్టాగ్రామ్‌ వేదికగా షేర్‌ చేస్తూ.. ఈ వీడియో తన వ్యక్తిగత స్వేచ్ఛకు భంగం కలిగించేదిగా ఉందంటూ ఆగ్రహం వ్యక్తం చేశారు. అభిమానులు తమ ఫేవరెట్‌ ఆటగాళ్లను చూసేందుకు, కలిసేందుకు ఉత్సాహం చూపుతారనే విషయం నాకు తెలుసు. వారి ఆసక్తి, ఉత్సాహాన్ని నేను అర్థం చేసుకోగలను. అలాంటి అభిమానులను ఎప్పుడూ నేను అభినందిస్తాను. కానీ నా గదికి సంబంధించిన వీడియోను చూసి నేను షాకయ్యాను. ఇది నా వ్యక్తిగత స్వేచ్ఛను హరించేలా ఉంది. నా హోటల్ రూమ్‌లో కూడా నాకు ప్రైవసీ లేకుంటే ఎలా..? ఇలాంటి అభిమానాన్ని నేను ప్రోత్సహించను.
ఆటగాళ్ల వ్యక్తిగత స్వేచ్ఛను హరించడం ఏ మాత్రం భావ్యం కాదు. దయచేసి ఆటగాళ్ల ప్రైవసీని గౌరవించండి. మీ వినోదం కోసం వారిని ఆట బొమ్మల్లా పరిగణించొద్దు అంటూ అభిమానులను కోరాడు. ఇదిలావుండగా సౌతాఫ్రికాతో మ్యాచ్ కోసం టీమిండియా పెర్త్‌లోని క్రౌన్ పెర్త్ హోటల్‌లో బస చేసింది. ఇంత పెద్ద హోటల్‌లో అది కూడా ఆటగాళ్లు లేని సమయంలో ఆగంతకుడు గదిలోకి ప్రవేశించాడని తెలిసి అందరూ ఆశ్చర్యపోతున్నారు. కాగా ఈ ఘటనపై ఆసీస్‌ స్టార్‌ క్రికెటర్‌ డేవిడ్‌ వార్నర్‌ స్పందించాడు. ఇది ఎంత మాత్రం ఆమోదయోగ్యం కాదన్నాడు. అలాగే కోహ్లీ భార్య అనుష్కశర్మ కూడా ఇది చాలా దారుణమంటూ ఆగ్రహం వ్యక్తం చేసింది.
View this post on Instagram
