Tirumala Anna Prasadam : తిరుమ‌ల భోజ‌న వివాదం.. ఇది అన్నమేనా అని తిట్టిపోస్తున్న భ‌క్తులు..

Tirumala Anna Prasadam : తిరుమలలో మాతృశ్రీ తరిగొండ వెంగమాంబ అన్నదాన సత్రంలో నిత్యం అన్న‌దానం జ‌రుగుతున్న విష‌యం తెలిసిందే. కొన్ని వేల కొల‌ది భ‌క్తులు ఈ అన్న‌ప్ర‌సాదాన్ని స్వీక‌రిస్తారు. అయితే తాజాగా భక్తులకు వడ్డించే ఆహారం నాణ్యత సరిగ్గా లేదంటూ కొందరు గొడవ చేయడం కలకలం రేపింది. సిబ్బంది వడ్డించిన అన్నప్రసాదం ఉడకలేదని, మరికొంత ముద్దగా ఉందని విమర్శలు చేస్తూ.. వాగ్వాదానికి దిగారు. ఇందుకు సంబంధించిన వీడియో వైరల్ అయ్యింది. ది అన్నమేనా! ఎలా తినాలి? పశువులమా, మనుషులమా! మీ ఇంట్లో అయితే ఇలాంటి అన్నం తింటారా?’’ అంటూ తిరుమల వెంగమాంబ నిత్యాన్నప్రసాద భవనంలో భక్తులు తీవ్ర ఆగ్రహావేశాలు వ్యక్తం చేశారు.

సోమవారం రాత్రి భోజనాలలో ఉడకని అన్నం వడ్డించడంతో భక్తులు తీవ్రంగా ఆవేదన చెంది సిబ్బందిని నిలదీశారు. బయట తినలేక కాదనీ, స్వామి ప్రసాదంగా భావించి పవిత్రభావంతో ఇక్కడికి వచ్చామని చెప్పుకొచ్చారు. ఇంత దారుణంగా ఉంటే ఎలా తినేదని వారు ప్ర‌శ్నించారు. ఆ సమయంలో అయ్యప్పభక్తులు కూడా ఉన్నారు. అనేకమంది అరిటాకుల్లోనే అన్నం వదిలేశారు. విధుల్లో ఉన్న సిబ్బందిపై మండిపడ్డారు. ఉద్యోగి మద్యం తాగి మాట్లాడుతున్నారని ఆరోపించారు. ఇంతలో విజిలెన్స్‌ ఉద్యోగులు అక్కడికి చేరుకుని వాతావరణం కారణంగా అన్నం గట్టిపడిందని సర్దిచెప్పే ప్రయత్నం చేశారు. ఎవరో వీడియో తీసి సోషల్‌ మీడియాలో పెట్టడంతో వైరల్‌గా మారింది.

ఈ వివాదంపై టీటీడీ చైర్మన్ భుమన కరుణాకర్ రెడ్డి స్పందించారు. దీనిపై ఆయన మాట్లాడుతూ.. ’’ఏళ్లుగా వెంకన్న భక్తులకు అన్నప్రసాదం అందిస్తున్నాం. ఇన్నేళ్లల్లో ఏనాడూ ఏ ఒక్కరూ అన్నప్రసాదాన్ని విమర్శించడం చూడలేదు. తిరుమల అన్నదానానికి సంబంధించి ఇంత వరకు ఒక్క ఫిర్యాదు రాలేదు. కానీ తాజాగా వెంగమాంబ అన్నప్రసాదాలయంలో కొంతమంది అన్నం నాణ్యత గురించి అల్లరి చేసినట్లు మాకు సమాచారం వచ్చింది. వచ్చిన వాళ్ల ఎమోషన్ ను గుర్తుంచుకోవాలి‘‘ అన్నారు. తప్పు జరిగితే సరిదిద్దుకోవడానికి టీటీడీ సిద్ధంగా ఉంటుంది. కానీ కొందరు పని గట్టుకుని ఆందోళన చేయాలని, అప్రతిష్ట పాలు చేయాలని భావిస్తున్నారు. అందుకే మిగతా భక్తులను రెచ్చగొట్టి.. ఆందోళన చేయించారు. ఇది సరైంది కాదు. పైగా దీన్ని వైరల్ చేస్తున్నారు. దీని వెన‌క ఏదో దురాలోచ‌న ఉంద‌ని ఆయ‌న అన్నారు.