Thatikonda Rajaiah : టిక్కెట్టు దక్కకపోవడంతో స్టేషన్ ఘన్ పూర్ సిట్టింగ్ ఎమ్మెల్యే తాటికొండ రాజయ్య అంబేద్కర్ విగ్రహం ముందు పడుకొని భావోద్వేగానికి గుర‌య్యారు.. స్టేషన్ ఘన్ పూర్ నుండి రాజయ్య స్థానంలో మాజీ డిప్యూటీ సీఎం కడియం శ్రీహరికి కేసీఆర్ టిక్కెట్టు కేటాయించారు. కేసీఆర్ ప్ర‌క‌టించిన జాబితాలో రాజయ్య స్థానంలో కడియం శ్రీహరికి బీఆర్ఎస్ నాయకత్వం టిక్కెట్టు కేటాయించింది. ఉమ్మడి ఏపీ రాష్ట్రంలో కూడ స్టేషన్ ఘన్ పూర్ నుండి టీడీపీ అభ్యర్ధిగా కడియం శ్రీహారి ప్రాతినిథ్యం వహించారు. గతంలో వీరిద్దరూ టీడీపీ, కాంగ్రెస్ పార్టీల్లో కొనసాగారు. 2014 ఎన్నికలకు ముందు కడియం శ్రీహరి టీడీపీని వీడి బీఆర్ఎస్ లో చేరారు. 2009 ఎన్నికల తర్వాత కొంత కాలానికే రాజయ్య బీఆర్ఎస్ లో చేరారు. 2014, 2018 ఎన్నికల్లో స్టేషన్ ఘన్ పూర్ నుండి రాజయ్యకు కేసీఆర్ టిక్కెట్టు ఇచ్చారు.
2014లో కేసీఆర్ మంత్రివర్గంలో రాజయ్యకు డిప్యూటీ సీఎంగా అవకాశం కూడా దక్కింది. అయితే కొన్ని కారణాల వ‌ల‌న రాజయ్యను మంత్రివర్గం నుండి భర్తరఫ్ చేసి అదే స్థానంలో కడియం శ్రీహరిని డిప్యూటీ సీఎంగా తీసుకున్నారు. అయితే 2018లో స్టేషన్ ఘన్ పూర్ నుండి పోటీకి కడియం శ్రీహరి ప్రయత్నించారు. కానీ కేసీఆర్ టిక్కెట్టు ఇవ్వలేదు. కడియం శ్రీహరికి ఎమ్మెల్సీ పదవిని పొడిగించారు. ప్రస్తుతం ఎమ్మెల్సీగా కడియం శ్రీహరి ఉన్నారు. అయితే వచ్చే ఎన్నికల్లో స్టేషన్ ఘన్ పూర్ నుండి కేసీఆర్ కడియం శ్రీహరికి అవకాశం కల్పించారు.
స్టేషన్ ఘ‌న‌పూర్ నియోజకవర్గం నుండి రాజయ్య 2014, 2018లో బీఆర్ఎస్ నుండి గెలిచారు. అయితే ఈసారి ఈ టిక్కెట్ ఎమ్మెల్సీ కడియం శ్రీహరికి దక్కింది. తనకు టిక్కెట్ దక్కకపోవడంతో రాజయ్య కన్నీటిపర్యంతమయ్యారు. కార్యకర్తల సమావేశంలో మాట్లాడుతూ… ఉన్నతస్థానం కల్పిస్తామని కేసీఆర్ తనకు చెప్పారన్నారు. ఇప్పుడు ఉన్న స్థానం కంటే మంచిస్థానం తనకు కల్పిస్తానని హామీ ఇచ్చారని, అధినేత మాటను గౌరవించి తాను ముందుకు సాగుతానన్నారు. కేసీఆర్ గీసిన గీతను తాను దాటేది లేదని, ఆయన ఆదేశాలు పాటిస్తానని స్పష్టం చేశారు.
