Nandamuri Suhasini : ఈ ఏడాది చివ‌ర‌లో తెలంగాణలో కొత్త ప్ర‌భుత్వం కొలువ‌దీర‌నుంది. ఏ ప్ర‌భుత్వం వ‌స్తుందా అని ప్ర‌తి ఒక్క‌రు ఆశ‌గా ఎదురు చూస్తున్నారు. తెలంగాణ అసెంబ్లీ ఎన్నికల బరిలో తెలుగుదేశం పార్టీ ఉంటుందని తెలుగుదేశం పార్టీ రాష్ట్ర అధ్యక్షుడు కాసాని జ్ఞానేశ్వర్ ప్రకటించిన విషయం తెలిసిందే. తెలంగాణ రాష్ట్రంలో ఎన్నికలలో తెలుగుదేశం పార్టీ 87 స్థానాల్లో పోటీకి రెడీ అయిందని, ఈ ఎన్నికలను టిడిపి ప్రతిష్టాత్మకంగా తీసుకుంటుందని, జనసేనతో పొత్తు విషయం పైన ఆలోచిస్తుందని కాసాని జ్ఞానేశ్వర్ ప్ర‌క‌టించ‌గా, ఇప్పుడు ఈ ఎన్నిక‌ల‌పై అంద‌రిలో ఆస‌క్తి నెల‌కొంది. తెలంగాణ రాష్ట్రంలో ముఖ్యంగా హైదరాబాద్లో తెలుగుదేశం పార్టీకి అభిమానులు ఉన్న నేపథ్యంలో కొన్ని సీట్లు అయినా టిడిపి తన ఖాతాలో వేసుకుంటుంది అని తెలుగుదేశం పార్టీ భావిస్తుంది.
క్షేత్రస్థాయిలో టిడిపికి ప్రజలలో బలం ఉందని, తమ ఓటు బ్యాంకు నుండి నష్టపోకుండా ఉండడం కోసం ఎన్నికల బరిలోకి దిగుతున్నట్టు విశ్లేష‌కులు చెబుతున్నారు. ఈ సారి తెలంగాణ రాష్ట్రంలో కొన్ని స్థానాలైన గట్టిగా సాధించాలని పట్టుదలతో ఉన్న టిడిపి నందమూరి కుటుంబానికి చెందిన ఆడపడుచును రంగంలోకి దించనున్న‌ట్టు వార్త‌లు వ‌స్తున్నాయి. 2018 ఎన్నికలలో తొలిసారి నందమూరి కుటుంబం నుంచి నందమూరి సుహాసిని ఎన్నికల బరిలోకి దిగారు. కూకట్పల్లి నియోజకవర్గం నుంచి సుహాసిని పోటీ చేశారు. అప్పట్లో కాంగ్రెస్ తో పొత్తుల లో భాగంగా పోటీ చేసిన నేపథ్యంలో ఆమె గెలుస్తుంది అని అంతా భావించారు. నందమూరి బాలకృష్ణ వంటి వారి ప్రచారం చేయడం కూడా కలిసి వస్తుందని నమ్మారు. ఊహించని విధంగా సుహాసిని ఓటమిపాలయ్యారు.
ఇప్పుడు సుహాసిని మ‌రోసారి తన అదృష్టాన్ని పరీక్షించుకోవడానికి టిడిపి నుంచి ఎన్నికల బరిలోకి దిగుతున్నారు. అయితే ఈసారి నందమూరి సుహాసిని ఎల్బీనగర్ నియోజకవర్గం, కూకట్పల్లి నియోజకవర్గం నుండి.. రెండు చోట్ల నుండి పోటీ చేస్తారని తెలుస్తుంది. ఈసారి సుహాసినిని గెలిపించుకోవడం అత్యంత ప్రతిష్టాత్మకంగా తెలుగుదేశం పార్టీ భావిస్తుంది. సెటిలర్లు ఎక్కువగా ఉండే ఎల్బీనగర్ తో పాటు కూకట్పల్లి సీటును సుహాసినికి కేటాయించినట్టు పార్టీ వర్గాలు చెబుతున్నాయి. గత ఎన్నికలలో ఎల్బీ న‌గ‌ర్‌ నుండి బీసీ నాయ‌కుడు ఆర్‌.కృష్ణ‌య్య విజ‌యం సాధించ‌గా, ఆయ‌న జోరుని బీఆర్ఎస్ అడ్డుకోలేక‌పోయింది. ఈ క్ర‌మంలోనే సుహాసినిని రంగంలోకి దించి స‌త్తా చాటాల‌ని ప్లాన్ చేస్తుఉన్న‌ట్టు స‌మాచారం.
