Tata IPL 2023 : ఈసారి ఐపీఎల్‌లో కొత్త రూల్స్‌.. మ‌రింత ఆస‌క్తిగా మార‌నున్న టోర్నీ..!

Tata IPL 2023 : టి20 ఫార్మాట్ ఎంట్రీతో క్రికెట్ ముఖ చిత్రమే ఎంత‌గా మారిపోయిందో ప్ర‌త్యేకంగా చెప్ప‌న‌క్క‌ర్లేదు . అప్పటి వరకు క్లాస్ గా సాగుతున్న క్రికెట్ లోకి ధనాధన్ షాట్లు ఎంట్రీ ఇచ్చాయి. ఇక ఇండియన్ ప్రీమియర్ లీగ్ ఎంట్రీతో క్రికెట్ పక్కా కమర్షియల్ గా మారిపోయింది. ఐపీఎల్.. మూడు పువ్వులు ఆరు కాయలుగా వెలిగిపోతుంది. అయితే టి20 ఫార్మాట్ ను మరింత రంజుగా మార్చడానికి బీసీసీఐ కొత్త ఐడియాల‌తో వచ్చేసింది. అయితే ఇప్ప‌టి వ‌ర‌కు ఔట్ విష‌యంలో డీఆర్ఎస్ తీసుకునే అవ‌కాశం ఉండేది. కాని ఇప్పుడు వైడ్, నో బాల్స్ కోసం స‌మీక్ష తీసుకునే వెసులు బాటు ఉంది.

మహిళల ప్రీమియర్ లీగ్ నుండి కొత్త రూల్ అందుబాటులోకి తీసుకొచ్చింది బీసీసీఐ. దీని ద్వారా ఆటగాళ్లు, వైడ్, నో బాల్ వంటి వాటిపై కూడా సమీక్ష కోరవచ్చు. ఉమెన్స్ ప్రీమియర్ లీగ్‌లో వైడ్ కి, నో బాల్‌కి ‘డీఆర్‌ఎస్‌’ రివ్యూ కోరే వెసులుబాటు కల్పించింది బీసీసీఐ. అంపైర్ల నిర్ణయాలను ఛాలెంజ్ చేసేందుకు ప్రతి జట్టుకు మూడు డీఆర్‌ఎస్ రివ్యూలు అందుబాటులో ఉంటాయి. అంపైర్ వైడ్ ఇవ్వకపోయినా, నో బాల్ ఇవ్వకపోయినా సదరు బ్యాటర్ డీఆర్‌ఎస్ కోరుకునే అవ‌కాశం ఉంది.. అనంతరం థర్డ్ అంపైర్, దానిని పరిశీలించి తుది నిర్ణయం ప్రకటిస్తాడు. రీసెంట్‌గా , యూపీ వారియర్స్-గుజరాజ్ జెయింట్స్ మధ్య జరిగిన మ్యాచ్‌లో యూపీ ప్లేయర్ గ్రేస్ హారీస్ ఈ విధంగా డీఆర్‌ఎస్ కోరి మ్యాచ్ ఫలితాన్నే మార్చేసింది.

ఆ మ్యాచ్‌లో మ్యాచ్ ఆఖరి ఓవర్‌లో విజయానికి 3 బంతుల్లో 6 పరుగులు అవసరం కాగా, హారీస్ వైడ్ పై సమీక్ష కోరి ఒక విలువైన పరుగును రాబ‌ట్టింది. దీంతో ఒక పరుగు తక్కువ కావడమే కాకుండా, అదనపు బంతి ప్రయోజనం చేకూరింది. రీసెంట్‌గా జ‌రిగిన ఆర్సీబీ, డీసీ మ్యాచ్‌లోను నో బాల్ కోసం రివ్యూ కోరుకోగా, వారికి అనుకూలంగా రాలేదు. ఇక ఇదే రూల్‌ని పురుషుల ఇండియన్ ప్రీమియర్ లీగ్ 2023 సీజన్‌లోనూ అమలు చేయబోతున్నారు. బంతి బంతికి రిజల్ట్ మారిపోయే పొట్టి క్రికెట్‌లో ప్రతీ పరుగు ఎంతో విలువైనదే కాబ‌ట్టి వీటికి కూడా డీఆర్‌ఎస్ తీసుకొచ్చినట్టు తెలుస్తోంది. అంతేకాదు ఇంపాక్ట్ ప్లేయ‌ర్ కూడా ఈ ఐపీఎల్ నుండి అందుబాటులోకి రానున్నాడు.