Super Star Krishna Death : టాలీవుడ్ కౌబోయ్, తెలుగు తెర ‘అల్లూరి’, సూపర్ స్టార్, పద్మభూషణ్ కృష్ణ నవంబ‌ర్ 15 తెల్లవారు జామున 4.09 నిల‌కు తుది శ్వాస విడిచారు. కార్డియాక్ అరెస్ట్‌కు గురైన కృష్ణను.. కుటుంబ సభ్యులు హుటాహుటిన కాంటినెంటల్ హాస్పిటల్‌కి తరలించ‌గా, అక్క‌డ ఐసీయూలోలో ఉంచి వెంటిలేటర్‌పై చికిత్సను అందించారు… అయితే కృష్ణ పరిస్థితి సీరియస్‌గానే ఉందని వైద్య‌లు ముందు నుండి చెబుతూనే ఉన్నారు. వాళ్లు అలా చెప్పిన కొన్ని గంటల వ్యవధిలోనే కృష్ణ ఆరోగ్యం మరింతగా క్షీణించడంతో మంగళవారం ఉదయం 4.09 నిల‌కు ఆయన మృతి చెందినట్లుగా వైద్యులు ధృవీకరించారు. వయో భారం వల్ల సమస్యలే తప్ప.. ఆయనకు ఆరోగ్యపరమైన ఇతర ఇబ్బందులేమీ లేవు.
ఈ మధ్య కాలంలో వరుసగా.. తను ప్రాణానికి ప్రాణంగా ప్రేమించే ముగ్గురు కుటుంబ సభ్యులు విజయ నిర్మల , పెద్ద కుమారుడు రమేష్ బాబు , ఆ తర్వాత మొదటి భార్య ఇందిరా దేవి , అదే సమయంలో తన ఆప్తమిత్రుడైన రెబల్ స్టార్ కృష్ణంరాజు ఇలా వరుసగా తనని విడిచి వెళ్లిపోవడంతో కృష్ణ తీవ్ర మనోవేదనకు గురయ్యారు. ఈ పరిణామాలు కృష్ణను మానసికంగా కృంగదీయడంతో.. ఆ ప్రభావం ఆయన ఆరోగ్యంపై కూడా పడింది. ఈ క్రమంలో కృష్ణ స్వ‌ర్గ‌స్తుల‌య్యారు. సూపర్ స్టార్ కృష్ణ మరణవార్త తెలిసిన సినీ, రాజకీయ ప్రముఖులు దిగ్భ్రాంతికి లోనయ్యారు. ఆయన ఆత్మకు శాంతి చేకూరాలని ప్రార్థిస్తూ.. కుటుంబ సభ్యులకు ప్రగాడ సానుభూతిని తెలుపుతున్నారు.
కృష్ణ మృతిపై వైద్యులు కీల‌క ప్ర‌క‌ట‌న చేశారు. కార్డియాక్ అరెస్ట్‌తో సోమవారం ఉదయం కృష్ణ కాంటినెంటల్ ఆసుపత్రికి వచ్చారని డాక్టర్‌ గురు ఎన్‌ రెడ్డి తెలిపారు. ఆ తర్వాత ఆయనకు ఐసీయూలో ఉంచి చికిత్స అందించామ‌ని అన్నారు. ఇక ఆసుపత్రికి వచ్చినప్పటి నుంచి కృష్ణ ఆరోగ్య పరిస్థితి క్రిటికల్‌గానే ఉందని, వచ్చిన కొద్ది గంటల్లో మల్టిపుల్‌ ఆర్గాన్స్‌ ఫెయిల్ అవ్వ‌డం జరిగింది. అప్పటికీ ఆయనకు చికిత్స ప్రారంభించాం. సుమారు నాలుగు గంటల తర్వాత డయాలసిస్‌ అవసరమైంది . సాయంత్రం 7 గంటలకు ఆయన ఆరోగ్య పరిస్థితి మరింత విషమించ‌డంతో పాటు, చికిత్సకు ఆయన శరీరం సహకరించలేదు.దీంతో చివరి క్షణాల్లో ఎలాంటి ఇబ్బందికి గురి కాకుండా, నొప్పి లేకుండా చూడాలని వైద్యులు కుటుంబ స‌భ్యుల‌తో చ‌ర్చించి నిర్ణయం తీసుకున్నట్లు పేర్కొన్నారు. ఈ క్రమంలో ఆయన 4.09 గంటలకు తుదిశ్వాస విడిచారని గురు ఎన్‌ రెడ్డి పేర్కొన్నారు.
1943, మే 31న గుంటూరు జిల్లా తెనాలి మండలం బుర్రిపాలెంలో ఘట్టమనేని శివరామకృష్ణ జన్మించారు. 1960లో ‘చేసిన పాపం కాశీకెళ్ళినా’ అనే నాటకంతో కృష్ణ నటుడిగా తొలిసారిగా స్టేజ్ ఎక్కారు. ఆదుర్తి సుబ్బారావు దర్శకత్వంలో తెరకెక్కిన తేనే మ‌న‌సులు సినిమ‌తో ఆయన నటుడిగా తన ప్ర‌స్థానం మొద‌లు పెట్టారు. 1968 నుంచి 74 వరకు ఒక్కో ఏడాది దాదాపు పదికిపైగా కృష్ణ చిత్రాలు విడుదల అయ్యాయి. ఆ టైమ్‌లో తెనాలిలో ఉన్న ఏడు థియేటర్లలో అన్నీ కృష్ణ సినిమాలే ఆడేవంటే ఆయన హ‌వా ఏ విధంగా సాగిందో అర్ధం చేసుకోవ‌చ్చు. 350 పైగా చిత్రాల్లో న‌టించిన కృష్ణ తన కెరీర్‌లో ఎన్నో సాంఘిక, జానపద, పౌరాణిక,జేమ్స్‌బాండ్, కౌబాయ్ వంటి డిఫరెంట్ చిత్రాల్లో న‌టించి మెప్పించారు. కృష్ణ మృతికి సంతాపంగా ఎల్లుండి సినిమా షూటింగ్‌ల‌కి సెల‌వు ప్ర‌క‌టించారు.
