SRH Vs LSG : కేఎల్ రాహుల్‌పై ల‌క్నో ఓన‌ర్ ఆగ్ర‌హం.. అంద‌రి ముందే తిట్టే స‌రికి నెటిజ‌న్ల ఆగ్ర‌హం..

SRH Vs LSG : ప్ర‌స్తుతం ఐపీఎల్ సీజ‌న్ 17 చివ‌రి ద‌శ‌కు చేరుకుంది. ఇక ఏయే జ‌ట్లు ప్లే ఆఫ్స్‌కి చేరుకుంటాయ‌నేది ఆస‌క్తిక‌రంగా మారింది. అయితే ముంబై ఇప్ప‌టికే అధికారికంగా ప్లే ఆఫ్స్ నుండి త‌ప్పుకుంది. ఇక మిగ‌తా జ‌ట్లు పోటీ ప‌డుతున్నాయి. అయితే బుధవారం జరిగిన మ్యాచులో సన్ రైజర్స్ హైదరాబాద్ చేతిలో చిత్తుగా ఓడిన లక్నో సూపర్ జెయింట్స్ ప్లే ఆఫ్స్ అవకాశాలు సంక్లిష్టం చేసుకుంది. అయితే ఈ మ్యాచులో తొలుత బ్యాటింగ్ చేసిన లక్నో.. పరుగులు చేసేందుకు తీవ్రంగా ఇబ్బంది పడింది. దీంతో నిర్ణీత 20 ఓవర్లలో 165/4 పరుగులకు పరిమితమైంది. కెప్టెన్ కేఎల్‌ రాహుల్‌ (33 బంతుల్లో 29 రన్స్‌) జిడ్డు బ్యాటింగ్ చేశాడు. ఇక సన్ రైజర్స్ ఓపెనర్లు.. లక్నో నిర్దేశించిన 166 పరుగుల లక్ష్యాన్ని 9.4 ఓవర్లలోనే ఊదేశారు. దీంతో వరుసగా రెండు మ్యాచుల్లో చిత్తుగా ఓడిన లక్నో.. ప్లే ఆఫ్స్ అవకాశాలను సంక్లిష్టం చేసుకుంది.

అయితే లక్నో నిర్దేశించిన 165 పరుగుల విజయ లక్ష్యాన్ని హైదరాబాద్ 9.4 ఓవర్లలోనే ఛేదించ‌డాన్ని జీర్ణించుకోలేకపోయిన లక్నో యజమాని సంజీవ్ గోయెంకా కోపంతో ఊగిపోయారు. ఎల్ఎస్‌జీ డగౌట్ వద్ద కెప్టెన్ కేఎల్ రాహుల్‌పై విరుచుకుపడ్డారు. ఇందుకు సంబంధించిన వీడియో వైరల్ అవుతోంది. ముఖ్యంగా ఈ ఓటమికి కెప్టెన్ కేఎల్ రాహుల్‌ను బాధ్యుడిని చేస్తూ గోయెంకా క్లాస్ పీకినట్లు ఈ వీడియోను చూస్తే అర్థమవుతోంది. మ్యాచ్ పరిస్థితిని కేఎల్ రాహుల్ చెప్పే ప్రయత్నం చేసినా సంజీవ్ గోయెంకా వినిపించుకోలేదు. కోపంతో ఊగిపోయారు. వారి మధ్య జరిగిన సంభాషణపై స్పష్టత లేనప్పటికీ సోషల్ మీడియాలో భిన్న‌మైన చ‌ర్చ న‌డుస్తుంది. ఇక ఆ మ్యాచ్ త‌ర్వాత కేఎల్ రాహుల్‌ను కెప్టెన్సీ బాధ్యతల నుంచి తప్పించే అవ‌కాశం కూడా ఉంద‌ని అంటున్నారు.

2016 సీజన్‌లో ధోనీ సారథ్యంలోని రైజింగ్ పుణే సూపర్ జెయింట్స్‌ పాయింట్స్ టేబుల్‌లో చివరి నుంచి రెండో స్థానంలో నిలిచిన స‌మ‌యంలో కూడా సంజీవ్ గోయెంకా.. ధోనిపై చిర్రుబుర్రులాడాడు. టీమ్ ఓటములకు బాధ్యుడిని చేస్తూ ధోనీని కెప్టెన్సీ బాధ్యతల నుంచి తప్పించి స్టీవ్ స్మిత్‌కు సారథ్య బాధ్యతలు అప్పగించాడు. ధోనీ ఫిట్‌నెస్‌ గురించి వివాదాస్పద వ్యాఖ్యలు చేశాడు. దాంతో ధోనీ, ఆర్‌ఎస్‌పీ మేనేజ్‌మెంట్‌కు గొడవ జరుగుతుందని ప్ర‌చారం జ‌రిగింది. ధోనీ సతీమణి సైతం తన భర్తకు మద్దతుగా సంజీవ్ గోయెంకాకు వ్యతిరేకంగా అప్పట్లో పోస్ట్‌లు పెట్టింది. అయితే ఆర్ఆర్‌పై కేకేఆర్ ఓడిన‌ప్పుడు షారూఖ్ ఎంత స్పోర్టివ్‌గా తీసుకొని వారిని మోటివేట్ చేశాడు. సంజీవ్ గోయెంకా.. కేఎల్‌కి క్ష‌మాప‌ణ‌లు చెప్పాల్సిందేనని డిమాండ్ చేస్తున్నారు.