Seetha Ramam : సైలెంట్‌గా వ‌చ్చి సెన్సేష‌న్ క్రియేట్ చేసిన రొమాంటిక్ చిత్రం సీతారామం. పీరియాడిక‌ల్ ల‌వ్ ఎంట‌ర్టైన‌ర్‌గా హ‌ను రాఘ‌వ‌పూడి తెర‌కెక్కించిన ఈ చిత్రంలో దుల్క‌ర్‌కు జోడీగా మృనాళ్ ఠాకూర్ హీరోయిన్‌గా న‌టించింది. ర‌ష్మిక మంద‌న్న కాశ్మీర్ ముస్లిం అమ్మాయిగా ముఖ్య పాత్ర‌లో న‌టించింది. సుమంత్‌, త‌రుణ్ భాస్క‌ర్ కీల‌క‌పాత్ర‌ల్లో న‌టించిన ఈ చిత్రాన్ని స్వ‌ప్న సినిమాస్ బ్యానర్పై స్వ‌ప్న ద‌త్ నిర్మించింది. ఇప్ప‌టికే రూ.80 కోట్ల మార్క్‌ను క్రాస్ చేసిన ఈ చిత్రం రూ.100 కోట్ల దిశ‌గా అడుగులు వేస్తుంది.
ఇటీవ‌లే ఈ చిత్రాన్ని హిందీలో కూడా విడుదల చేశారు. అక్క‌డ కూడా సీతారామం అనూహ్య రెస్పాన్స్‌ను సొంతం చేసుకుంది. ఈ చిత్రం విడుద‌లై 25 రోజులు దాటుతున్నా ఇప్ప‌టికీ క‌లెక్షన్లు స్ట‌డీగానే ఉన్నాయి. తాజాగా సీతారామం ఓటీటీ రిలీజ్‌కు సంబంధించిన ఓ వార్త నెట్టింట తెగ వైరల్ అవుతుంది. ఈ సినిమాను ఓటీటీలో విడుదల చేయబోతున్నట్టు అమెజాన్ ప్రైమ్ అధికారికంగా ప్రకటించింది. ఈ నెల 9 నుంచి అమెజాన్ ప్రైమ్ లో స్ట్రీమింగ్ కాబోతోంది. భారీ ధరకు ఈ సినిమా డిజిటల్ హక్కుల్ని అమెజాన్ వారు కైవసం చేసుకున్నట్టు సమాచారం.
థియేటర్స్‌లో అశేష ప్రేక్ష‌కాద‌ర‌ణ పొందిన ఈ చిత్రం ఓటీటీలో ఏ స్థాయిలో ఆదరణ దక్కించుకుంటుందన్నది ఆసక్తిగా మారింది. సీతారామం చిత్రం తెలుగు, తమిళ, మలయాళ వెర్షన్స్ ఓటీటీలో అందుబాటులో ఉంటాయి. దీనికి సంబంధించిన ఓ పోస్టర్ ను కూడా విడుదల చేశారు. ఇక ప్రముఖ నిర్మాణ సంస్థ వైజయంతీ మూవీస్ బ్యానర్ సమర్పణలో స్వప్నా సినిమాస్ బ్యానర్పై సీనియ‌ర్ నిర్మాత సి.అశ్వినీద‌త్ ఈ చిత్రాన్ని నిర్మించారు. విశాల్ చంద్ర శేఖ‌ర్ బాణీలు, నేప‌థ్య సంగీతం, పి.ఎస్‌.విందా సినిమాటోగ్ర‌ఫీ సినిమాను ప్రేక్ష‌కుల‌కు మ‌రింత చేరువ చేశాయి.
