Samantha And Naga Chaitanya : మార్చ్ 19 సాయంత్రం ముంబైలో అమెజాన్ ప్రైమ్ కంపెనీ తమ ఓటీటీలో రాబోయే సినిమాలు, సిరీస్ ల గురించి స్పెషల్ గా ఓ ఈవెంట్ నిర్వహించిన విషయం తెలిసిందే. ఈ ఈవెంట్కి అన్ని సినీ పరిశ్రమల నుంచి ఆయా సినిమాలకు చెందిన పలువురు సినీ సెలబ్రిటీలు, మూవీ యూనిట్స్ ఈ వేడుకకు హాజరయ్యారు. ఒక్కో సినిమాకి చెందిన వ్యక్తులని స్టేజిపైకి పిలిపించి ఆ సినిమా, సిరీస్ గురించి మాట్లాడించారు. ఈ నేపథ్యంలో అమెజాన్ నుంచి సమంత మెయిన్ లీడ్ లో రాజ్ & డీకే దర్శకత్వంలో నటించిన సిటాడెల్ సిరీస్ రాబోతుంది. ఈ టీం కూడా ఈవెంట్ లో పాల్గొన్నారు. సిటాడెల్ హనీ బన్నీ అనే కొత్త టైటిల్ తో ఈ సిరీస్ ని ప్రమోట్ చేసారు. ఇక ఈ ఈవెంట్ కి సమంత పక్షి రెక్కల్లా ఉండే ఓ డిజైన్ డ్రెస్ వేసుకొచ్చింది.
ఇదే ఈవెంట్ కి నాగ చైతన్య దూత 2 సిరీస్ కోసం వచ్చాడు. నాగచైతన్య మొదటిసారి దూత అనే వెబ్ సిరీస్ తో గత సంవత్సరం అమెజాన్ లో రాగా ఆ సిరీస్ మంచి విజయం సాధించింది. దీంతో ఆ సిరీస్ కి సీక్వెల్ ప్రకటించారు. దూత 2 సిరీస్ ని ఈ వేదికపై ప్రకటించారు. ఈ ఈవెంట్ కి సమంత, నాగచైతన్య హాజరయ్యారు. మరి ఇద్దరూ ఎదురుపడ్డారా? కలుసుకున్నారా? మాట్లాడారా? అని నెటిజన్లు ఆసక్తికరంగా సందేహాలు వ్యక్తపరుస్తున్నారు. ఒకే ఈవెంట్లో చైతన్య, సమంత అంటూ వీడియోలు, ఫోటోలు వైరల్ అవుతున్నాయి. ఇద్దరి అభిమానులు కూడా చైతు, సామ్ సిరీస్ లని ప్రమోట్ చేస్తుండటంతో దూత 2 వర్సెస్ సిటాడెల్ అని పలువురు కామెంట్స్ చేస్తున్నారు.
హీరో నాగచైతన్య, హీరోయిన్ సమంతల బంధం గురించి అందరికి తెలిసిన విషయమే. ప్రేమించి పెళ్లి చేసుకున్న ఈ జంట.. కొన్ని సంవత్సరాలకే విడాకులు తీసుకోవడం జరిగింది. తెలుగు ఇండస్ట్రీలో సమంత -నాగచైతన్య జంట బెస్ట్ పెయిర్గా నిలుస్తుందని అందరు భావించారు. కానీ వీరి మధ్య విభేదాలు రావడంతో విడాకులు తీసుకుని ఎవరి జీవితాన్ని వారు కొనసాగిస్తున్నారు. అయితే విడాకుల విషయంలో అభిమానులు రెండు వర్గాలుగా విడిపోయి.. సమంతది తప్పంటే.. లేదు నాగచైతన్యదే తప్పని సోషల్ మీడియా వేదికగా యుద్దం చేశారు.విడాకులపై నాగచైతన్య ఎప్పుడు మాట్లాడింది లేదు. కాని సమంత మాత్రం తన సినిమాల విడుదల సమయంలో పరొక్షంగా విడాకులపై స్పందిస్తూ వస్తున్నారు.
