Samantha : ప్ర‌స్తుతం టాలీవుడ్ స్టార్ హీరోయిన్‌గా ఓ వెలుగు వెలిగిపోతుంది సమంత. ఆమె కెరియ‌ర్ ఈ స్థాయికి రావ‌డంలో చిన్మయి కూడా ఓ కార‌ణంగా చెప్ప‌వ‌చ్చు. ఏమాయ చేశావే సినిమాలో సమంత పాత్రకి చిన్మయి డబ్బింగ్ చెప్పింది. అందులో ఆమె పాత్రతో పాటు వాయిస్ కి కూడా మంచి ఫ్యాన్ ఫాలోయింగ్ ఏర్పడింది. చిన్మయి వాయిస్ చాలా క్యాచీగా ఉండ‌డంతోపాటు సమంత న‌ట‌న అంద‌రిని మెప్పించడంతో అప్ప‌టి నుండి ఈ కాంబినేష‌న్ ని అంద‌రూ ఇష్ట‌ప‌డ‌డం మొద‌లు పెట్టారు. అప్పట్నుంచే వీరి మధ్య మంచి సాన్నిహిత్యం కూడా ఏర్పడింది.
చిన్మయిపై ఎవ‌రైనా త‌ప్పుడు కామెంట్స్ చేస్తే సమంత వెంట‌నే స్పందించేది. అలాగే స‌మంత‌ని ఎవ‌రైనా ఏమ‌న్నా అన్నా కూడా చిన్మయి వెంట‌నే రియాక్ట్ అయ్యేది. ఆ మధ్య పూజ హెగ్డే.. సమంత వివాదంలో కూడా చిన్మయి సామ్ కి సపోర్ట్ చేస్తూ ఇండైరెక్ట్ గా పూజని ఏకి పారేసింది. మ‌రోవైపు చిన్మయి మీటూ ఆరోపణలు చేసినప్పుడు సామ్ బహిరంగంగా తన స్నేహితురాలికి మద్దతు పలికింది. అలాగే ఫ్యామిలీ మ్యాన్‌ -2 వెబ్‌ సిరీస్ విషయంలో సామ్‌ని పలువురు విమర్శించినప్పుడు ఈ స్టార్ సింగర్‌ సమంతకు సపోర్టుగా నిలబడింది.
ఇలా ఒక‌రికొక‌రు పలు సంద‌ర్భాల‌లో స‌పోర్ట్‌గా నిలిచారు. అయితే ఈ మధ్య కాలంలో ఇద్ద‌రి మధ్య దూరం ఎక్కువైన‌ట్టు క‌నిపిస్తుంది. సమంత తన పాత్ర‌ల‌కు తానే డబ్బింగ్ చెప్పుకుంటుంది. చిన్మయి కూడా ఇటీవ‌ల సమంత గురించి ఎక్క‌డ మాట్లాడిన దాఖ‌లాలు లేవు. దీంతో ఇద్ద‌రి మధ్య కోల్డ్ వార్ న‌డుస్తుంద‌ని కొంద‌రు పుకార్లు పుట్టించారు. తాజాగా దీనిపై స్పందించిన చిన్మయి పలు ఆసక్తికర వ్యాఖ్యలు చేసింది.
తామిద్దరం కలుసుకున్న ప్రతిసారీ సోషల్ మీడియాలో ఫొటోలు పెట్టడం కుదరదని, అలా ఫొటోలు పెట్టనంత మాత్రాన విడిపోయినట్టు కాదని స్పష్టం చేసింది. తనకు తెలుగులో డబ్బింగ్ ఆర్టిస్ట్ గా కెరీర్ ఊపందుకోవడానికి సమంతే కారణమని, అయితే ఇప్పుడు సమంతకు తన వాయిస్ అవసరంలేదని పేర్కొంది. సమంతే స్వయంగా డబ్బింగ్ చెప్పుకుంటున్న నేప‌థ్యంలో డబ్బింగ్ ఆర్టిస్ట్ గా సమంతతో తన ప్రయాణం ముగిసినట్టేనని చిన్మయి వెల్లడించింది.
