Sai Chand : తెలంగాణ రాష్ట్ర గిడ్డంగుల సంస్థ చైర్మన్, ప్రముఖ గాయకుడు సాయిచంద్ అకాల మరణం చెందాడు. బుధవారం సాయంత్రం కుటుంబ సభ్యులతో కలిసి నాగర్ కర్నూల్ జిల్లా బిజినపల్లి మండలం కారుకొండలోని తన ఫామ్ హౌస్‌కి వెళ్లారు. అర్ధరాత్రి తీవ్ర అస్వస్థకు గురైన సాయిచంద్‌ని నాగర్ కర్నూల్‌లోని ఓ ప్రైవేట్ ఆసుపత్రికి కుటుంబ సభ్యులు తరలించారు..ఆయ‌న‌కి గుండెప‌టు వ‌చ్చిన‌ట్టుగా డాక్టర్లు నిర్థారించారు. ఆయన ఆరోగ్య పరిస్థితి విషమించడంతో మెరుగైన చికిత్స కోసం హైదరాబాద్‌కు సాయిచంద్‌ను తరలించారు. గచ్చిబౌలి కేర్‌ ఆసుపత్రిలో చికిత్స పొందుతూ సాయిచంద్ కన్నుమూశారు.
సాయి చంద్ మరణంతో బీఆర్ఎస్ శ్రేణుల‌లో తీవ్ర విషాదం అలుముకుంది. సీఎం కేసీఆర్, మంత్రులు, బీఆర్ఎస్ నేతలు సంతాపాన్ని తెలియజేశారు. ఆయనతో ఉన్న అనుబంధాన్ని గుర్తు చేసుకున్నారు. మంత్రి హరీష్‌రావు, బీఆర్ఎస్ నేతలు భావోద్వేగానికి గురయ్యారు. అయితే హాస్పిటల్ ముందు స్ట్రక్చర్ పై సాయి చంద్ ను పడుకోబెట్టి… ఆసుపత్రిలోకి తీసుకువెళ్లే వీడియో ఇప్పుడు వైరల్ గా మారింది. ఈ సందర్భంగా సాయి చందు భార్య, పిల్లలు రోదిస్తున్న సంఘటన ఈ వీడియోలో స్పష్టంగా కనిపిస్తోంది. ఇక ఈ వీడియోని చూసిన వారు.. భావోద్వేగానికి గురవుతున్నారు.
తన భ‌ర్త మృతి చెందాడని తెలిసి సాయి చంద్ భార్య గుండెలు ప‌గిలేలా ఏడ్చింది. సాయిచంద్ భార్య రజనీని ఓదార్చడం సిఎం కు కూడా కష్టంగా మారింది. దగ్గరకు వచ్చి రోధిస్తున్న సాయిచంద్ తండ్రిని సీఎం అక్కున చేర్చుకొని ఓదార్చారు. నేనున్నానంటూ భరోసా ఇచ్చారు. ఓదశలో సాయిచందర్ భౌతిక కాయాన్ని చూసి కేసీఆర్… కంటతడి పెట్టారు. చిన్న వయస్సులో సాయిచంద్ మరణం కలచివేసిందని.. ఆయన మరణంతో తెలంగాణ గొప్ప గాయకుడ్ని, కళాకారుడ్ని కోల్పోయిందని దిగ్భ్రాంతి వ్య‌క్తం చేశారు. ఇక సాయిచంద్… విద్యార్థి దశ నుంచి కళాకారుడు, గాయకుడిగా మంచి పేరు తెచ్చుకున్నారు. తెలంగాణ మలిదశ ఉద్యమంలో తన ఆటపాటలతో ప్రజల్లో ఉద్యమస్ఫూర్తిని నింపారు. తెలంగాణ రాష్ట్రం ఆవిర్భవించిన తర్వాత రాష్ట్రంలో సాధించిన ప్రగతిని, ప్రభుత్వం అమలుచేస్తున్న సంక్షేమ పథకాలను తన పాటలతో చాటి చెప్పారు.
