Roja : ఏపీ రాజకీయాలు రోజురోజుకి మ‌రింత రంజుగా మారుతున్నాయి. మొన్న‌టి వరకు పవన్ క‌ళ్యాణ్‌ని టార్గెట్ చేసి దారుణ‌మైన కామెంట్స్ చేసిన వైసీపీ నాయ‌కులు ఇప్పుడు చిరంజీవిని విమ‌ర్శిస్తున్నారు. వాల్తేరు వీర‌య్య ఈవెంట్‌లో చిరంజీవి.. ఏపీ ప్రభుత్వాన్ని ఉద్దేశిస్తూ చేసిన కామెంట్స్ కి ఇప్పుడు వైసీపీ నాయ‌కులు కౌంట‌ర్ ఇస్తున్నారు. ఇప్ప‌టికే చిరంజీవి కామెంట్స్ పై కొడాలి నాని, పేర్ని నాని, అంబ‌టి రాంబాబు, అమ‌ర్‌నాథ్ వంటి వారు దారుణంగా స్పందించారు. ఇక తాజాగా రోజా మాట్లాడుతూ.. చిరంజీవి చెబితే పని చేసే పరిస్థితుల్లో జగన్ లేడని అన్నారు.
గడపగడపకూ వచ్చి చూస్తే తమ ప్రభుత్వం రోడ్లు వేసిందో? లేదో? తెలుస్తుందన్నారు. చిరంజీవికి ఏం అర్హత ఉందని సినిమా టిక్కెట్ ధరలు పెంచమని అడిగారని నిలదీశారు. హీరోలందరూ కలిసి జగన్ దగ్గరకు ఎందుకు వెళ్లారో చెప్పాలన్నారు. ఇప్పటి వరకు ఏ హీరో కూడా ప్రభుత్వాన్ని విమర్శించలేదని, పవన్ కల్యాణ్, చిరంజీవి మాత్రమే ఇలా మాట్లాడుతున్నారని ధ్వజమెత్తారు. తమ్ముడు పవన్ కోసం చిరంజీవి మాట్లాడి ఉంటారని..మెగ్రా బ్రదర్స్ కలిసి వస్తేనే ప్రజలు తిరస్కరించారని గుర్తు చేసారు. కేంద్ర మంత్రిగా చిరంజీవి ఏపీకి ఏం చేసారని రోజా నిలదీసారు. పార్టీని తీసుకెళ్లి కాంగ్రెస్ లో విలీనం చేసి కేంద్ర మంత్రిగా పని చేసిన చిరంజీవి రాష్ట్రానికి ఏం చేసారని ప్రశ్నించారు.
ఏపీకి ఒక్క ప్రాజెక్టు అయినా తీసుకొచ్చారా అని రోజా నిలదీసారు. ప్రత్యేక హోదా కోసం ఎందుకు మాట్లాడ లేదో చిరంజీవి చెప్పాలన్నారు. జగన్ మీద నమ్మకం లేకపోతే హీరోలు అందరినీ తీసుకొని చిరంజీవి సీఎం దగ్గరకు ఎందుకు వెళ్లినట్లని ఆమె ప్రశ్నించారు. చర్చకు తాను సిద్దమని చిరంజీవికి సవాల్ చేసారు రోజా. చిరంజీవికి తమ్ముడు మీద ప్రేమ ఎక్కువై అలా మాట్లాడి ఉంటారని రోజా పేర్కొన్నారు. తమ్ముడికి బలం ఇచ్చేందుకు ఆ కామెంట్స్ చేసి ఉంటారన్నారు. గతంలో పార్టీ పెట్టి నమ్ముకున్న వాళ్లను రోడ్డు పైన వదిలేసి వాళ్లు సినిమాలు చేసుకుంటున్నారని దుయ్యబట్టారు. వాళ్లు నమ్మకం కోల్పోయారని విశ్లేషించారు. చిరంజీవి రాజకీయాల్లోకి వచ్చినా మరోసారి తిరస్కరణ తప్పదని రోజా పేర్కొన్నారు.
