Rohit Sharma : ప్రపంచకప్ ఆఖరి మెట్టుపై టీమిండియా బొక్క‌బోర్లా ప‌డింది. అప్ప‌టి వ‌రకు ఒక్క మ్యాచ్‌లో కూడా ఓట‌మి చెంద‌ని భార‌త్ ఫైన‌ల్ లో ఆసీస్‌పై దారుణంగా ఓడింది. టోర్నీలో తొలి రెండు మ్యాచ్ ల్లో ఓడిపోయి.. ఆ తర్వాత వరుస విజయాలు సాధించి.. సెమీస్ లో దక్షిణాఫ్రికాను మట్టికరిపించి.. తుది సమరంలో టీమిండియాను కంగుతినిపించి ఆరోసారి ట్రోఫీ ద‌క్కించుకుంది ఆసీస్ జట్టు. 241 పరుగుల సాధారణ టార్గెట్ తో బరిలోకి దిగిన ఆస్ట్రేలియా జట్టు.. 43 ఓవర్లలో 4 వికెట్లు కోల్పోయి లక్ష్యాన్ని అందుకుంది. దీంతో.. ఆరు వికెట్ల తేడాతో విక్టరీ సాధించింది. ఆస్ట్రేలియా బ్యాటర్లలో ట్రావిస్ హెడ్ (120 బంతుల్లో 137 పరుగులు; 15 ఫోర్లు, 4 సిక్సర్లు) సూపర్ సెంచరీతో హీరోగా నిలిచాడు. అతనికి మార్నస్ లబుషేన్ (110 బంతుల్లో 58 పరుగులు నాటౌట్; 4 ఫోర్లు) సహకరించాడు.
ఆఖరి మెట్టుపై బోల్తా పడటం ఫ్యాన్స్ కు ఏడుపు తెప్పించింది. టీమిండియా ఆటగాళ్లు కూడా దు:ఖాన్ని ఆపుకోలేకపోయారు. మ్యాచ్ పూర్తయిన వెంటనే మహమ్మద్ సిరాజ్ కన్నీటి పర్యంతమయ్యాడు. రోహిత్ శర్మ సైతం తలదాచుకుంటూ నేరుగా డ్రెస్సింగ్ రూమ్‌లోకి వెళ్లాడు. ఇతర ఆటగాళ్లు కూడా కెమెరాలకు తమ ముఖాలను చూపించుకోలేకపోయారు. ఇక, రోహిత్ భార్య రితికా కూడా కన్నీళ్లు ఆపుకోలేకపోయింది. క‌ప్ కొడ‌తార‌ని అంద‌రు భావించిన స‌మ‌యంలో ఇండియా అలా ఓడిపోవ‌డం ఎవ‌రికి మింగుడుప‌డ‌లేదు.
మ్యాచ్ అనంత‌రం రోహిత్ శర్మ మాట్లాడుతూ.. తీవ్ర భావోద్వేగానికి గురై ఓటమిని ఒప్పుకున్నాడు. తాము సరిగ్గా ఆడలేకపోయామని, బ్యాటింగ్‌లో మరో 20, 30 పరుగులు చేయాల్సిందని చెప్పుకొచ్చాడు. ట్రావిస్ హెడ్, లబుషేన్‌ల భాగస్వామ్యమే తమకు మ్యాచ్‌ను దూరం చేసిందని అన్నాడు. ఈ సందర్భంగా ఆస్ట్రేలియా గెలుపు క్రెడిట్ వారికే ఇచ్చాడు. నిజానికి రెండో ఇన్నింగ్స్‌లో పిచ్ బ్యాటింగ్‌కు అనూకూలించిందని, కానీ తాము దానిని సాకుగా చెప్పాలనుకోవడం లేదని రోహిత్ శర్మ. ఇక్కడ ప్లడ్ లైట్ల కింద బ్యాటింగ్ చేయడం ఏ జట్టుకైనా అనుకూలిస్తుందని మాకు ముందే తెలుసు. మేము ముందుగా తగినన్నీ పరుగులు చేయలేదు. మా పేసర్లు ఆరంభంలోనే 3 వికెట్లు తీశారు. కానీ ఆ తర్వాత దానిని కొనసాగించలేకపోయాం. మధ్యలో అత్యుత్తమ భాగస్వామ్యాన్ని నెలకొల్పిన వారిద్దరికే క్రెడిట్ దక్కుతుంది.’’ అని రోహిత్ శర్మ చెప్పాడు.
