Revanth Reddy : స్కిల్ డెవలప్‌మెంట్‌ కేసులో ఏపీ మాజీ సీఎం, టీడీపీ అధినేత చంద్రబాబు నాయుడు అరెస్ట్ వ్యవహారం దేశ వ్యాప్తంగా ఎంత సంచ‌ల‌నం సృష్టించిందో ప్ర‌త్యేకంగా చెప్ప‌న‌క్క‌ర్లేదు. ఆయ‌న అరెస్ట్ చేసిన విధానంపై చాలా మంది ఖండించారు.అయితే ఓ ప్రెస్ మీట్‌లో చంద్రబాబు అరెస్ట్‌పై మీ స్పంద‌న ఏంట‌ని రేవంత్‌ని ప్రశ్నించగా, ఆయ‌న ఎట్ల చూస్తాం, అరెస్ట్ మాదిరిగానే చూస్తాం అని సింపుల్‌గా అన్నారు. ఇదే విష‌యంపై ఓ ఇంట‌ర్వ్యూలో రేవంత్‌ని ప్రశ్నించగా, ఆయ‌న దానికి స్పందించారు. ప్ర‌స్తుతం పీసీసీ అధ్య‌క్షుడిగా ఉన్నాను. మాకు కొన్ని విధివిధానాలు ఉంటాయి. నాక ప‌ర్స‌న‌ల్‌గా ఆయ‌న‌కు నాకు ఎంత రిలేష‌న్ ఉన్నా కూడా పార్టీ విధి విధానాల బ‌ట్టి న‌డుచుకోవ‌ల‌సి ఉంటుంద‌ని చెప్పారు.
ఏపీలో కాంగ్రెస్ పార్టీ నాయ‌కులు చంద్రబాబు అరెస్ట్‌ని ఖండించారు. తుమ్మల నాగేశ్వ‌ర‌రావు కూడా దానిని త‌ప్పుబ‌ట్టారు. అయితే నేను కాంగ్రెస్ పార్టీ అధ్య‌క్షుడిగా ఉన్న నేప‌థ్యంలో ఓపెన్‌గా మాట్లాడ‌లేను. ఆయ‌నేంటో నాకు తెలుసు.నేనేంటో ఆయ‌న‌కు తెలుసు. ఎవ‌రు ఏమ‌నుకుంటే మాకేంటి అన్న‌ట్టు రేవంత్ రెడ్డి మాట్లాడారు. రేవంత్ ఇచ్చిన క్లారిటీతో అంద‌రిలో ఒక అభిప్రాయం వ‌చ్చింది. అయితే చంద్రబాబు అరెస్ట్ త‌ర్వాత హైదరాబాద్ లో నిరసనలు చేస్తుంటే ఇక్కడ చేయాల్సిన అవసరం లేదని కావాలంటే రాజమండ్రిల్లో నిరసనలు చేసుకోవాలని, బాబు అరెస్టుకు హైదరాబాద్‌కి సంబంధం ఏముందని ప్రశ్నించడం సరికాదని కేటీఆర్ అన‌గా దానిని ఖండించారు రేవంత్.
చంద్రబాబు జాతీయ స్థాయి నాయకుడన్నారు. హైదరాబాద్ పదేళ్లపాటు తెలుగు రాష్ట్రాల ఉమ్మడి రాజధాని అని గుర్తు చేశారు. ఏపీకి సంబంధించిన అంశాలపై ఇక్కడ నిరసన జరపొద్దని అంటే ఎలా అని ప్రశ్నించారు. నిరసనలు వద్దంటూ చేస్తున్న వ్యాఖ్యలు సరికాదన్నారు. చంద్రబాబు కోసం చేపట్టిన నిరసనలకు రేవంత్ రెడ్డి మద్దతు తెలిపారు.హైదరాబాద్‌లో నిరసనలు తెలిపేవారు ఇక్కడి ఓటర్లే అన్న సంగతి బిఆర్‌ఎస్ నేతలు మరవొద్దని సూచించారు. చంద్రబాబు కోసం నిరసన తెలిపే వాళ్లంతా ఇక్కడి ఓటర్లేనన్నారు.
