Renu Desai : ఒక‌ప్ప‌టి స్టార్ హీరోయిన్, ప‌వ‌న్ క‌ళ్యాణ్ మాజీ భార్య రేణూ దేశాయ్ గురించి ప్రత్యేకంగా చెప్ప‌న‌క్క‌ర్లేదు. చాలా కాలంగా సినిమాల‌కు దూరంగా ఉంటున్న రేణూ ఇప్పుడు టైగర్ నాగేశ్వరరావు చిత్రంతో రీఎంట్రీ ఇస్తుంది. అయితే ఆదివారం రేణూ బ‌ర్త్ డే కావ‌డంతో చాలా కాలం తరవాత ఒక సినిమా సెట్స్‌లో కేక్ కట్ చేశారు. ‘టైగర్ నాగేశ్వరరావు’ సినిమా సెట్స్‌లో రేణు దేశాయ్ పుట్టినరోజు వేడుకలు జరిగాయి. చిత్ర యూనిట్ సమక్షంలో రేణు దేశాయ్ కేక్ కట్ చేశారు. ఈ మేరకు అభిషేక్ అగర్వాల్ ఆర్ట్స్ ట్వీట్ చేసింది. రేణు దేశాయ్ కేక్ కట్ చేస్తున్న ఫొటోలను సైతం షేర్ చేసింది. ఆమె పోషిస్తోన్న హేమలత లవణం పాత్ర చాలాకాలం గుర్తుండిపోతుందని పేర్కొంది.
టైగర్ నాగేశ్వరరావు చిత్రంలో రేణు దేశాయ్ కీలక పాత్ర పోషిస్తున్న విష‌యం తెలిసిందే. . సుమారు 19 ఏళ్ల తరవాత రేణు దేశాయ్ ఈ సినిమా ద్వారా మళ్లీ వెండితెరపై కనిపించనున్నారు. సంఘసంస్కర్త, రచయిత్రి అయిన హేమలత లవణం పాత్రలో రేణు దేశాయ్ నటిస్తుండ‌గా, ఈ పాత్ర రేణు దేశాయ్ కి మంచి పేరు ప్ర‌ఖ్యాత‌లు తెచ్చిపెడుతుంద‌ట. ఇక రేణు దేశాయ్ ఆదివారంతో 41వ వసంతంలోకి అడుగుపెట్టింది. దీంతో అభిమానులు, సెలెబ్రిటీలు ఆమెకి పుట్టినరోజు శుభాకాంక్షలు చెప్పారు. రేణు దేశాయ్ ఇకపై మరిన్ని చిత్రాల్లో నటించాలని కోరుకున్నారు.
టైగర్ నాగేశ్వరరావు పేరుమోసిన స్టువర్ట్‌పురం దొంగ. ఆయన బయోపిక్‌గా 70ల నేపథ్యంలో ఈ సినిమా రూపుదిద్దుకుంటుంది. ఈ సినిమా కోసం రవితేజ ప్రత్యేకంగా మేకోవర్ కాగా, ఇందులో డిక్షన్‌, డైలాగ్ డెలవరీ, గెటప్‌ గత చిత్రాలకు పూర్తి భిన్నంగా ఉంటూ, మునుపెన్నడూ క‌నిపించ‌ని పాత్రలో రవితేజ క‌నిపించ‌నున్నాడ‌ట. రవితేజ సరసన నూపూర్ సనన్, గాయత్రి భరద్వాజ్ హీరోయిన్లుగా నటిస్తున్నారు. తెలుగు, తమిళ, కన్నడ, మలయాళ, హిందీ భాషల్లో ఈ చిత్రాన్ని రూపొందిస్తున్నారు. ఇక ఈ చిత్రంలో జాతీయ పురస్కార గ్రహీత, ప్రముఖ నటుడు అనుపమ్ ఖేర్ మరో కీలక పాత్ర పోషిస్తున్నారు. అభిషేక్ అగర్వాల్ గత చిత్రాలు ‘ద కశ్మీర్ ఫైల్స్’, ‘కార్తికేయ 2’లోనూ అనుపమ్ ఖేర్ కీలక పాత్రలు పోషించారు.
