Rakesh Master : ప్రముఖ కొరియోగ్రాఫర్ రాకేష్ మాస్టర్ మృతి తో అంద‌రు షాక్ అయ్యార.. తన విచిత్రమైన యాటిట్యూడ్, నిర్మొహమాటంగా చేసే విమర్శలు అత‌నికి యూట్యూబ్‌లో స్టార్‌డం తెచ్చిపెట్టాయి. ఇటీవ‌ల బిగ్ బాస్ షోకు పారడీగా ఈ మధ్యే ఒక యూట్యూబ్ ఛానెల్‌లో ‘మ్యాన్షన్ హౌస్ మై హౌస్’ అని ఒక రియాలిటీ షోను రాకేష్ మాస్టర్ మొదలుపెట్టారు. అగ్గిపెట్టి మచ్చ, స్వాతినాయుడు, సునిశిత్, ఉప్పల్ బాలు వంటి యూట్యూబ్ స్టార్లతో ఈ షో మొద‌లు పెట్టారు. విజయనగరం శివారులోని ఓ రిసార్ట్స్‌లో ఈ షో షూటింగ్ చేశారు. అయితే ఆయన అనారోగ్యానికి గురి కావ‌డంతో వారం క్రితం హైద‌రాబాద్‌కి వ‌చ్చారు.
రెండు రోజులుగా రక్తపు విరోచనాలు కావ‌డంతో ఆయ‌న‌ని స్థానికంగా ఉన్న ఓ ప్రైవేటు హాస్పిటల్లో చేర్చారు. పరిస్థితి విషమించడంతో వెంట‌నే సికింద్రాబాద్‌లోని గాంధీ ఆసుపత్రికి తరలించారు. అక్కడ చికిత్స పొందుతూ సాయంత్రం 5 గంటల సమయంలో రాకేష్ మాస్టర్ తుదిశ్వాస విడిచారు. ఆయన వయసు 53 సంవత్సరాలు. అయితే అంత బ్ర‌త‌కు బ్ర‌తికిన రాకేష్ మాస్టర్ గాంధీ ఆసుప‌త్రిలో క‌న్నుమూయ‌డం ఎవ‌రు జీర్ణించుకోలేక‌పోతున్నారు. సాధార‌ణంగా గాంధీ ఆసుప‌త్రి అంటే సాధార‌ణ ప్ర‌జ‌లు మాత్ర‌మే అక్కడ వైద్యం తీసుకుంటారు. ప్రభాస్ లాంటి స్టార్ హీరోకి డ్యాన్స్ నేర్పిన రాకేష్ మాస్టర్ గాంధీలో మృతి చెంద‌డంపై అభిమానులు ఆవేద‌న వ్య‌క్తం చేస్తున్నారు.
రాకేష్ మాస్టర్ గత కొన్ని రోజులుగా అనారోగ్యంతో బాధపడుతుండ‌గా, ఆయన బతకడం కష్టమని రెండు నెలల క్రితమే వైద్యులు చెప్పారట. గతంలో ఆయన ‘హనుమాన్’ సినిమా షూటింగ్ లో పాల్గొన్న సమయంలోనే రక్తపు వాంతులు, విరేచనాలు అయ్యాయని చెప్పారు. అప్పుడు ఆసుపత్రికి తీసుకెళ్తే అన్ని రకాల పరీక్షలు చేయ‌డంతో ఆయన పరిస్థితి విష‌మంగానే ఉంద‌ని వైద్యులు స్ప‌ష్టం చేశారు. రాకేష్ మాస్టర్ అసలు పేరు రామారావు. ఆయన 1968 సంవత్సరంలో తిరుపతిలో జన్మించారు. ‘ఆట’, ‘ఢీ’ వంటి పాపులర్ డ్యాన్స్ రియాల్టీ షోల ద్వారా ఆయన కెరీర్‌ ను ప్రారంభించారు. దాదాపు 1500 సినిమాలకు రాకేష్ కొరియోగ్రాఫర్ గా చేశారు. ప్రస్తుతం తెలుగులో టాప్ కొరియోగ్రాఫర్ లుగా కొనసాగుతోన్న శేఖర్ మాస్టర్, జానీ మాస్టర్ ఆయన శిష్యులే.
