Raghavendra Rao : తెలుగుదేశం పార్టీ జాతీయ అధ్యక్షుడు నారా చంద్రబాబు నాయుడు అరెస్ట్‌ను దిగ్గజ దర్శకుడు, దర్శకేంద్రుడు కె.రాఘవేంద్రరావు తప్పుబట్టారు. ఒక విజనరీ లీడర్ అయిన చంద్రబాబును అరెస్ట్ చేసిన విధానం అప్రజాస్వామికం అని ఆయన ధ్వజమెత్తారు. తన ట్విట్ట‌ర్‌లో రాఘవేంద్రరావు…‘ఆంధ్రప్రదేశ్‌లో ప్రజాస్వామ్యం అపహాస్యం అయ్యింది. ఒక విజనరీ లీడర్ అయినటువంటి నారా చంద్రబాబు నాయుడు గారిని అరెస్ట్ చేసిన విధానం అప్రజాస్వామికం. ఏపీలో ఉన్న అంబేద్కర్ విగ్రహాలన్నీ కూడా తాను రాసిన రాజ్యాంగం చచ్చిపోతున్నందుకు బాధ పడుతున్నాయి’ అని కె.రాఘవేంద్రరావు తన ట్వీట్‌లో పేర్కొన్నారు.
చంద్రబాబు అరెస్ట్‌పై దర్శకేంద్రుడు స్పందించడాన్ని వైసీపీ శ్రేణులు వైల్డ్‌గా రియాక్ట్ అవుతున్నాయి. 100కు పైగా సినిమాలు తీసిన ఒక దిగ్గజ దర్శకుడిపై అత్యంత దారుణంగా కామెంట్లు చేస్తున్నారు వైసీపీ అభిమానులు. బండబూతులు తిడుతున్నారు. వార్తలో రాయలేనటువంటి పరుష పదజాలం, బూతులతో విరుచుకుపడుతున్నారు. ‘అంబేద్కర్ విగ్రహాలన్నీ బాధపడతాయి’ అని రాఘవేంద్రరావు పేర్కొన్న లైన్‌ను అండర్‌లైన్ చేసి ట్రోల్ చేస్తున్నారు. ‘పోనీలే రామారావు విగ్రహాలన్నీ హ్యాపీగా ఫీలవుతాయి’ అంటూ ఎగతాళి చేస్తున్నారు. మొత్తం మీద చంద్రబాబు నాయుడు అరెస్ట్ సోషల్ మీడియాలో టీడీపీ, వైసీపీ మధ్య వార్‌కు దారితీసింది.
టీడీపీ అధినేత, మాజీ సీఎం చంద్రబాబును అరెస్ట్ చేసిన ఘటనను అరెస్ట్ చేసిన విధానాన్ని టీడీపీ నాయకులు, ఆయన మద్దతుదారులు ఖండిస్తున్నారు. కమ్యూనిస్టులతో పాటు ప్రజాసంఘాల నాయకులు, జనసేన అధినేత పవన్ కళ్యాణ్ తో సహా పలువురు చంద్రబాబు అరెస్ట్ తీరును ఖండిచారు.చంద్రబాబు అరెస్ట్ త‌ర్వాత ఏపీలో పలు జిల్లాల్లో టీడీపీ నేతలను హౌస్ అరెస్ట్ చేశారు పోలీసులు. టీడీపీ కార్యకర్తలు ఆందోళనలు చేయకుండా ఎక్కడిక్కడే పోలీసులను భారీగా మోహరించారు. అయినా పలు ప్రాంతాల్లో కార్యకర్తలు ఆందోళనలు చేపట్టారు. చంద్రబాబును విజయవాడకు తరలిస్తున్న రోడ్లపై టీడీపీ శ్రేణులు ఆందోళన కార్యక్రమాలు చేపడుతున్నారు.
