Pawan Kalyan : జ‌న‌సేన అధినేత పవన్ క‌ళ్యాణ్ ప్ర‌స్తుతం రాజ‌కీయాల‌తో బిజీగా ఉన్నారు. వారాహి యాత్ర మూడో విడతలో భాగంగా విశాఖలోని జగదాంబ సెంటర్‌లో నిర్వహించిన బహిరంగ సభలో జనసేనాని మాట్లాడారు. ‘‘వైసీపీని ఆంధ్రా నుంచి తన్ని తరిమేయాలి.. అది విశాఖ నుంచే కావాలి. రాష్ట్రాన్ని నాశనం చేయడానికి ఒక్కడు చాలు. సీఎం జగన్‌కి , వైసీపీ గూండాలకు భయపడొద్దు. జగన్‌కి మేం బానిసలం కాదు.. మేము నీకెందుకు భయపడతాం. నేను ప్రాణాలకు తెగించి రాజకీయాల్లోకి వచ్చా అని పవన్ క‌ళ్యాణ్ అన్నారు. పొట్టి శ్రీరాములను గుర్తు పెట్టుకోవడం లేదు.. రాష్ట్రమంతా దోచుకున్నవారి వైఎస్ విగ్రహాలు ఉన్నాయి. సీఎం కావాలని నేను అనుకుంటే సరిపోదు.. మీరు అనుకోవాలి.’’ అని అభిమానులకు, కార్యకర్తలకు జనసేనాని పిలుపునిచ్చారు.
నాకు నటనలో పాఠాలు నేర్పి, మీ అందరికీ దగ్గర చేసిన విశాఖ నగరం నాకు అన్నం పెట్టిన నేల. జగదాంబ జంక్షన్ లో 25 ఏళ్ల క్రితం సుస్వాగతం సినిమా కోసం బస్సు మీద ఎక్కి డాన్స్ చేసినపుడు సిగ్గుతో ఉన్న నాకు, అదే జగదాంబ జంక్షన్ లో మళ్లీ లక్షలాది మంది జనం సాక్షిగా రాజకీయ ప్రసంగం ఇచ్చిన ప్రాంతం ఇది. ఉత్తరాంధ్ర మాండలీకం, సంస్కృతి మీద గౌరవం కలిగించిన విశాఖకు నేను ఎప్పటికీ రుణపడి ఉంటాను. విశాఖ నుంచి వైసీపీని పూర్తిగా విముక్తం చేసే వరకు మనం కలిసికట్టుగా పోరాడుతాం. మళ్లీ ప్రశాంత విశాఖను అంతే అందంగా సాధించుకుందాం అని పవన్ క‌ళ్యాణ్ తెలియ‌జేశారు.
ఎంపీ కుటుంబ సభ్యుల్ని ఒక రౌడీ కిడ్నాప్ చేశారు.. కానీ ఏమీ చేయలేక పోయారు. కరెంట్, పెట్రోల్ చార్జీలు పెంచారు. చెత్త మీద పన్ను వేశారు. ఎంత సేపు మూడు పెళ్లిళ్లు చేసుకున్నానని అంటారు. వలంటీర్లు మీద నాకు ద్వేషం లేదు. మీ చేత జగన్ తప్పులు చేయిస్తున్నారు. ప్రజల డేటా హైదరాబాద్ వెళ్లి పోతుంది. మీకు రూ.5 వేలు ఇస్తున్నారు. కానీ నేను ఇంకో రూ. 5 వేలు ఇవ్వాలని అనుకునేవాడిని. వలంటీర్లు చేస్తుంది చట్టవిరుద్ధం. కొంత మంది వలంటీర్లు అక్రమాలకు, మోసాలకు పాల్పడ్డారు. జగన్‌తో చాలా డేంజర్.. అందరూ గ్రహించాలి అని పవన్ కీలక వ్యాఖ్య‌లు చేశారు. ఇక త‌న అన్న‌య్య చిరంజీవిని రోజా, కొడాలి నాని వంటి వారు తీవ్ర విమ‌ర్శ‌లు చేయ‌గా, వారికి కూడా త‌న వ్యాఖ్య‌ల‌తో గ‌ట్టి స‌మాధానం ఇచ్చారు పవన్.
