అమెరికాలో నివసిస్తున్న భారతీయులు త‌మ పిల్లలకు దూరం కావ‌ల్సి వ‌స్తుందా.. ఇప్పుడు ఈ విష‌యం వారికి వ‌ణుకు పుట్టిస్తుంది. అమెరికాలోని భారతీయులకు ‘గ్రీన్ కార్డ్’ ముప్పు ముంచుకొస్తోంది! ముఖ్యంగా.. భారతీయుల పిల్లలు, వారి తల్లిదండ్రులకు దూరమయ్యే ప్రమాదం ఉన్నట్టు డేటా సూచిస్తోంది. గ్రీన్ కార్డ్ దరఖాస్తులు కుప్పలుతెప్పలుగా పడి ఉండటం ఇందుకు ఓ కారణం.హెచ్ 1 బీ వీసాతో అమెరికాలో ఉద్యోగం చేస్తున్న వారు ఈ ముప్పును ఎదుర్కొంటున్నారు. ఈ వీసా హోల్డర్ల పిల్లలకు అమెరికా హెచ్ 4 వీసా జారీ చేస్తుంది. వారు 21 ఏళ్లు వచ్చే వరకు అమెరికాలో తల్లిదండ్రులతో కలిసి ఉండవచ్చు. ఈ లోపు గ్రీన్ కార్డ్ వస్తే శాశ్వతంగా నివసించే హక్కు లభిస్తుంది. లేదంటే అమెరికా వదిలి వెళ్లాల్సి ఉంటుంది.
ప్రస్తుతం హెచ్ 4 వీసా ప్రాసెసింగ్ కు వెయిటింగ్ పీరియడ్ చాలా ఎక్కువగా ఉందని అమెరికాలోని భారత సంతతి తల్లిదండ్రులు చెబుతున్నారు. హెచ్ 1 బీ వీసాతో అమెరికాలో పనిచేస్తున్న భారతీయుల సంఖ్య లక్షల్లో ఉందని ఇమిగ్రేషన్ అధికారులు చెప్పుకొచ్చారు.ఇక హెచ్ 4 వీసాతో ఉంటున్న పిల్లలు కూడా అదే సంఖ్యలో ఉంటారని అంచనా వేస్తున్నారు. ఇందులో 21 ఏళ్లకు చేరువైన యువత 1.34 లక్షల మంది.. ప్రస్తుతం వీరంతా డిపోర్టేషన్ (దేశం నుంచి పంపించివేసే ప్రక్రియ) ముప్పు ఎదుర్కొంటున్నారు. అమెరికాలో ఇప్పుడున్న నిబంధనల ప్రకారం వీరందరికీ గ్రీన్ కార్డు రావాలంటే కనీసం 135 ఏళ్లు పడుతుందని అంచనా.
గతకొంతకాలంగా ఈ విష‌యంపై అమెరికాలో ఆందోళనలు జరుగుతున్నాయి. భారత సంతతి యువతతో పాటు ఇతర దేశాలకు చెందిన యువత కూడా ఈ సమస్యపై ఆందోళన వ్య‌క్తం చేస్తున్నారు. అయితే గ్రీన్ కార్డ్ రావడం కూడా అంత ఈజీ కాదు. వీటిని ప్రతియేటా జారీ చేసినా.. ప్రతి దేశంపై గరిష్ఠంగా 7శాతం క్యాప్ విధిస్తోంది అమెరికా. ఇక ఇండియా విషయానికొస్తే.. ఇప్పటికే 10.7లక్షలకుపైగా మంది భారతీయులు.. గ్రీన్ కార్డ్ కోసం క్యూలో ఉన్నారు. మరణాలు, అప్లికేషన్లను వెనక్కి తీసుకోవడం వంటిని పరిగణలోకి తీసుకున్నా.. గ్రీన్ కార్డ్ వచ్చేసరికి 54ఏళ్లు పడుతుంది.
