Organic Mama Hybrid Alludu : ప్రముఖ సినీ దర్శకుడు ఎస్వీ కృష్ణారెడ్డి దర్శకత్వంలో తెరకెక్కిన సినిమా ‘ఆర్గానిక్ మామ హైబ్రీడ్ అల్లుడు’. ఈ సినిమాలో బిగ్ బాస్ ఫేమ్ సోహెల్, మృణాళిని రవి హీరో హీరోయిన్లుగా నటించారు. గత నెలలో వెండితెర‌పై సంద‌డి చేసిన ఈ మూవీ ఇప్పుడు అమెజాన్ ప్రైమ్ లో అందుబాటులోకి వచ్చింది. మామ- అల్లుడు అనే కాన్సెప్ట్ తో తీసిన ఆ సినిమా పేరు ‘ఆర్గానిక్ మామ హైబ్రీడ్ అల్లుడు’ అనే టైటిల్ ఫిక్స్ చేయ‌గా, ఈ సినిమా క‌థ ఏంటి, మూవీ ఎలా ఉందో చూద్దాం.
క‌థ‌లోకి వెళితే విజయ్ (సోహెల్ సయ్యద్ ర్యాన్) రెండు డిజాస్టర్ సినిమాలు తీసిన డైరెక్టర్. మధ్య తరగతి కుటుంబం (హేమ, సూర్య) కుమారుడైన విజయ్.. బిజినెస్ మ్యాన్ వెంకట రమణ (రాజేంద్ర ప్రసాద్, మీనా) దంపతుల కుమార్తె (హాసిని)తో తొలిచూపులోనే ల‌వ్‌లో ప‌డ‌తాడు. డబ్బు, సంస్కారానికి ప్రాధాన్యం ఇచ్చే వెంకటరమణ తన కూతురు ప్రేమను నిరాకరిస్తాడు. ఈ క్రమంలో విజయ్‌కి నిర్మాత ముణికొండ అనకొండ ( సునీల్) మూడో సినిమా అవకాశం ఇస్తాడు. అయితే రెండు సినిమాలు ఫ్లాప్ అయ్యాక విజయ్ ఏం చేశాడు.. మూడో సినిమా అవకాశం వచ్చిన తర్వాత హిట్ కొట్టాడా? తన ప్రేమను గెలిపించుకోవడానికి విజయ్ ఏం చేశాడు అనేది చిత్ర క‌థ.
చిత్రంలో సొహైల్ ఎనర్జిటిక్ గా చేసుకుంటూ వెళ్లిపోయాడు. హీరోయిన్ గా చేసిన మృణాళిని రవి.. జస్ట్ నవ్వుతో సీన్లనీ లాక్కొచ్చేసింది. ఇందులో రాజేంద్ర ప్రసాద్, మీనా, హేమ, అలీ, సునీల్, సప్తగిరి, వరుణ్ సందేష్, రష్మీ.. ఇలా చాలామంది ప్రముఖ నటీనటులు ఉండ‌గా వారు త‌మ పాత్ర‌ల‌కి కొంత న్యాయం చేశారు. డైరెక్టర్ SV కృష్ణారెడ్డి.. ఇప్పటి జనరేషన్, ట్రెండ్ ని అర్థం చేసుకోలేక మమ అనిపించేశారు. హీరోయిన్‌కు పెళ్లి చూపులు ఎపిసోడ్స్‌ను సుదీర్ఘంగా సాగదీయడం.. ఛాన్స్ దొరికితే డైలాగ్స్‌తో క్లాసులు పీకడం అతిగా అనిపిస్తుంది. అమలాపురం ఎపిసోడ్ సహనానికి పరీక్షలాగా ఉంటుంది.థియేట‌ర్‌లో పెద్ద‌గా ఆడ‌ని ఈ సినిమాని టైమ్ పాస్ కోసం అయితే చూడొచ్చు.
