YS Sharmila : రాష్ట్ర విభజన తర్వాత ఏపీలో కాంగ్రెస్ పార్టీ రాష్ట్ర విభజన తరువాత నామ రూపాలు లేకుండా పోయింది.1953 లో ఆంధ్ర రాష్ట్రం ఏర్పడినప్పటి నుంచి అసెంబ్లీలో అధికార పక్షమో, ప్రతిపక్షంగానో ఉంటూ వచ్చిన పార్టీ 2014 నాటికి అసెంబ్లీలో క‌నిపించ‌కుండా పోయింది. ఒక్క సీటు ద‌క్క‌లేదు. అంతేకాదు 2014, 2019 ఎన్నికల్లో ఘోర పరాజయాన్ని చవిచూడాల్సిన ప‌రిస్థితి వ‌చ్చింది. ఇలాంటి సమయంలో కాంగ్రెస్ ప్ర‌భుత్వం కొత్త ఎత్తుగ‌డ‌లు వేస్తుంది. పార్టీని నిర్మాణ ప‌రంగా ముందుకు తీసుకెళ్లే క్ర‌మంలో ఒక మహిళ చేతికి కాంగ్రెస్ నాయకత్వం ప‌ద‌వి ఇచ్చింది. వైఎస్ షర్మిలకి కాంగ్రెస్ పార్టీ ఏపీ అధ్యక్షురాలుగా బాధ్యతలు అందించింది.
ఉమ్మడి ఏపీకి పీసీసీ ప్రెసిడెంట్ గా రెండు సార్లు పనిచేసిన వైఎస్సార్ తనయగా షర్మిల అదే హోదాలో పార్టీ పగ్గాలు అందుకోవడం ఒక విశేషంగా చెప్పాలి. ఇక ఏపీ అధ్య‌క్షురాలిగా ప‌దవీ బాధ్యతలు అందుకున్న తర్వాత ష‌ర్మిళ చుట్టూ పాత కాపులు క్యూ క‌డుతున్నారు. ఇటీవల షర్మిలతో కేవీపీ రామచంద్రరావు, రఘువీరారెడ్డి యాదవ్ షర్మిళ‌తో భేటి అయ్యారు. ఇక మాజీ ఎంపీ ఉండవల్లి అరుణ్ కుమార్ తో షర్మిల భర్త బ్రదర్ అనీల్ భేటీ అయిన విషయం తెలిసిందే. సీనియర్లలో మాజీ ఎంపీ హర్షకుమార్ లాంటి కొందరు షర్మిలను తీవ్రంగా వ్యతిరేకిస్తున్నారు. జేడీ శీలం, పళ్ళంరాజు లాంటి చాలామంది షర్మిలకు మద్దతుగా నిలబడ్డారు. కాంగ్రెస్ లో వైఎస్సార్ కి అండగా నిలిచిన వారు ఆయన నేస్తం కేవీపీ రామచంద్రరావు. ఆయన వైఎస్సార్ ని వెన్నంటి ఉండేవారు. వైఎస్సార్ ది గ్లామర్ అయితే కేవీపీది గ్రామర్ అని చెప్పుకునే వారు. ఇప్పుడు ఆయన ష‌ర్మిళ వెంట ఉండ‌డం వివేషం.
వైఎస్‌కు ఒకప్పుడు బాగా సన్నిహితంగా ఉండేవాళ్ళలో చాలామంది షర్మిల చుట్టూ చేరుతున్నట్లు అర్థ‌మవుతోంది. 2009 తర్వాత పార్టీలో నుండి జగన్మోహన్ రెడ్డి బయటకు వచ్చేసినప్పుడు పైన చెప్పుకున్న సీనియర్లు ఎవరూ మద్దతుగా బయటకు రాలేదు. కాని ఇప్పుడు ష‌ర్మిళ అధ్య‌క్షురాలిగా నియ‌మించ‌బ‌డ్డ తర్వాత బయటకు రావ‌డం చ‌ర్చ‌నీయాంశంగా మారింది.కేవీపీ ఇటీవల షర్మిల కుమారుడి నిశ్చితార్థ వేడుకలో ఆయన వేదికపై కనిపించారు. ఇక షర్మిల వైఎస్ఆర్ ఘాట్ వద్దకు వెళ్లే సమయంలో ఆమె వెంట ఉన్నారు. వైఎస్ రాజశేఖర్ రెడ్డి పక్కనే ఉండే కేవీపీని ఆయన నీడగా అంతా చెప్పుకునే వారు. అంతే కాదు ఆయన వైఎస్సార్ కి ముఖ్యమంత్రిగా పనిచేసిన కాలంలో ముఖ్య సలహాదారుగా కూడా పనిచేశారు. మొత్తానికి చూస్తే కనుక ఏపీలో కాంగ్రెస్‌ను పునరుజ్జీవింపజేయాలనే లక్ష్యంతో ఉన్న వైఎస్ షర్మిలకు కేవీపీ అనే కొండంత అండ దొరికినట్లు కనిపిస్తోంది.
