Nara Lokesh : గ‌త కొద్ది రోజులుగా నారా లోకేష్ యువ‌గ‌ళం పేరుతో పాదయాత్ర చేస్తున్న విష‌యం తెలిసిందే. మంగళగిరి సమీపంలోని యర్రబాలెంలో నిర్వహించిన హలో లోకేష్ కార్యక్రమంలో తమ భవిష్యత్తుపై యువత వ్యక్తంచేసిన సందేహాలకు లోకేష్ విస్పష్టమైన సమాధానాలిచ్చారు. కార్యక్రమానికి టిడిపి రాష్ట్ర అధికార ప్రతినిధి మహాసేన రాజేష్ వ్యాఖ్యాతగా వ్యవహరించారు. యువనేత లోకేష్ మాట్లాడుతూ… రాష్ట్రానికి పరిశ్రమలు రాబట్టేందుకు తమ వద్ద చంద్రబాబు అనే బ్రాండ్ ఉందని, ఆ బ్రాండ్ తోనే గతంలో కియా, టిసిఎల్, ఫ్యాక్స్ కాన్, సెల్ కాన్ వంటి ప్రఖ్యాత పరిశ్రమలు రాష్ట్రానికి వచ్చాయని చెప్పారు. అధికారంలోకి వచ్చిన మూడేళ్లలో ప్రజారాజధాని అమరావతిని పూర్తిచేస్తామని తెలిపారు.
మీ వయసు చాలా తక్కువ..మీ నాన్న 14 ఏళ్లు సీఎంగా ఉన్నారు. రాజశేఖర్ రెడ్డి 5 ఏళ్లు సీఎంగా ఉన్నారు. రాజశేఖర్ రెడ్డి అధికారంతో కొడుకు జగన్..67 కంపెనీలు పెట్టుకుని లక్ష కోట్లు దోచుకున్నారు. మీరు కూడా మీ నాన్న 14 ఏళ్ల సీఎం పదవి అండతో 200 కంపెనీలు పెట్టుకుని రూ.3 లక్షలు కోట్లు దోచుకోక పాదయాత్ర ఎందుకు చేస్తున్నారు? అని రాజేష్ ప్ర‌శ్నించారు. నా పాదయాత్ర యువత కోసం చేస్తున్నా. రాష్ట్రం అన్ని రంగాల్లో వెనక్కిపోతోంది. యువతలో చైతన్యం తీసుకొచ్చేందుకు పాదయాత్ర చేస్తున్నా. యువత సోషల్ మీడియా పోస్టు పెడితే ఈ ప్రభుత్వం కేసులు పెడుతోంది. 2019 తర్వాత నాపై 20 కేసులు పెట్టారు. రాష్ట్రం కోసం పోరాడుతన్నవారిపై కేసులు పెట్టి వేధిస్తున్నారు. యవత గళం..ఈ సైకోకు వినిపిస్తాం.
జగన్ పాదయాత్ర చేశారు..చంద్రబాబు రక్షణ కల్పించారు. విశాఖ ఎయిర్ పోర్టులోకి వెళ్లి కోడికత్తితో పొడిపించుకుని డ్రామా ఆడారు. రాష్ట్రంలోని ఆసుపత్రులపై నమ్మకం లేక హైదరాబాద్ వెళ్లారు. ఈ ప్రభుత్వంలో మీరు రోజూ యుద్ధం చేస్తున్నారు..రాళ్ల, గుడ్లు వేస్తున్నారు. ప్రాణాలకు తెగించి పోరాడుతున్నారు. మీకు ఏరోజైనా భయం వేసిందా అని అడగ‌గా, యం అనే పదం వింటే మామయ్య డైలాగ్ గుర్తుకొస్తోంది..భయం అనే పదం నా బయోడేటాలో లేదు. ఏ తప్పూ చేయని మనం ఎందుకు భయపడాలి.? నేను తండ్రిని అడ్డం పెట్టుకుని సంపాదించుకోలేదు. యువత కోసం, ప్రజల కోసం పాదయాత్ర చేస్తున్నా..తగ్గేదే లేదు. యశ్వంత్, పెనుమూడి, దుగ్గిరాల మండలం: నేను హైదరాబాద్ లో సాఫ్ట్ వేర్ ఉద్యోగం చేస్తున్నా..వారు హమారా హైదరాబాద్ అని గొప్పగా చెప్పుకుంటున్నారు. మా రాజధాని ఏది అని చెప్పుకోవాలి..మాకేంటి ఈ ఖర్మ అని లోకేష్ అన్నారు.
