Nara Devansh : టీడీపీ జాతీయ ప్రధాన కార్యదర్శి నారా లోకేశ్ యువగళం పాదయాత్ర 3000 కిలో మీటర్ల మైలురాయిని పూర్తి చేసుకున్న విష‌యం తెలిసిందే. ఈ సందర్భంగా కాకినాడ జిల్లా తుని నియోజకవర్గం రాజుల కొత్తూరు వద్ద ఏర్పాటు చేసిన పైలాన్‌ను నారా లోకేష్ ఆవిష్కరించారు. ఈ కార్యక్రమంలో లోకేశ్ సతీమణి నారా బ్రాహ్మణి, తనయుడు దేవాన్ష్, బాలకృష్ణ తనయుడు మోక్షజ్ఞ కూడా పాల్గొన్నారు. ఈ సందర్భంగా లోకేశ్ పాదయాత్రలో ఆసక్తికర సన్నివేశం చోటుచేసుకుంది. తండ్రి లోకేశ్‌తో కలిసి దేవాన్ష్ పరుగులు పెడుతూ పార్టీ కార్యకర్తల్లో ఉత్సాహం నింపారు.219వ రోజు ఆదివారం 16.3 కి.మీ నడిచారు.. సోమవారం పాదయాత్ర ప్రారంభించి.. తుని నియోజకవర్గం రాజుల కొత్తూరు దగ్గర 3వేల కిలోమీటర్ల పాదయాత్ర పూర్తి చేసుకున్న పైలాన్‌ను ఆవిష్కరించారు.
పైలాన్ ఆవిష్కరణ కార్యక్రమంలో నారా లోకేష్, ఆయన సతీమణి బ్రాహ్మణి, కుమారుడు దేవాన్ష్, నందమూరి బాలకృష్ణ చిన్నల్లుడు శ్రీభరత్‌, బాలకృష్ణ కుమారుడు మోక్షజ్ఞ హాజరయ్యారు. టీడీపీ నేతలు, కార్యకర్తలు పెద్ద ఎత్తున పాల్గొన్నారు. అయితే కొడుకుతో నారా లోకేష్ చేసిన సంద‌డి అంద‌రి దృష్టిని ఆక‌ర్షించింది. కొడుకు చేసే తుంట‌రి చేష్ట‌ల‌ని ఆస్వాదిస్తూనే మ‌రోవైపు కొడుకుకి ప‌లు సూచ‌న‌లు చేశారు. దేవాన్ష్‌తో లోకేష్ చేసిన సంద‌డికి సంబంధించిన ఫొటోలు, వీడియోలు నెట్టింట వైరల్గా మారుతున్నాయి.
ఎప్పుడో ఓసారి బయట కనిపించే మోక్షజ్ఞ.. ఇవాళ యువగళం పాదయాత్రలో కనిపించారు.తన అక్కా బావ బ్రాహ్మణి, లోకేష్‌తో కలిసి ఉత్సాహంగా అడుగులు వేశారు. మోక్షజ్ఞ సినిమాల్లోకి ఎప్పుడెప్పుడు వస్తారా? అని నందమూరి ఫ్యాన్స్ చాలా కాలంగా ఎదురుచూస్తున్నారు. మంచి పవర్ ఫుల్ సినిమాతో సినీ రంగ ప్రవేశం చేయాలని కోరుకుంటున్నారు. త్వరలోనే వారి కోరిక నెరవేరే అవకాశాలు కనిపిస్తున్నాయి. యువగళం పాదయాత్రలో పాల్గొన్న నందమూరి మోక్షజ్ఞ.. ఫిట్‌గా కనిపించారు. తన బావ లోకేష్ చేతిలో చెయ్యి వేసి.. కుటుంబ సమేతంగా ముందుకు కదిలారు. ప్రస్తుతం ఆ ఫొటోలు, వీడియోలు సామాజిక మాధ్యమాల్లో వైరల్గా మారాయి.
