Naga Babu : మెగా బ్రదర్ నాగబాబు న‌టుడు, నిర్మాత, జ‌డ్జిగా తెలుగు ప్రేక్ష‌కుల మ‌న‌సులు గెలుచుకున్నాడు. చిరంజీవి త‌మ్ముడిగా ఇండ‌స్ట్రీలోకి ఎంట్రీ ఇచ్చిన ఆయ‌న న‌టుడిగా, నిర్మాత‌గా పెద్ద‌గా ఎద‌గ‌లేక‌పోయారు. నిర్మాత‌గా అయితే ఆయనకు చాలా నష్టాలు వచ్చాయ‌నే చెప్పాలి. అయితే ఆయనకు ఎప్పటికీ మరవలేని జ్ఞాపకాలు మిగిల్చింది ‘ఆరెంజ్’ మూవీ. మెగా పవర్ స్టార్ రామ్ చరణ్ హీరోగా భారీ బడ్జెట్ కేటాయించి ఈ సినిమా రూపొందిస్తే ఈ సినిమా కాస్తా అట్టర్ ప్లాప్ కావడంతో అప్పులపాలయ్యారు నాగబాబు. బొమ్మరిల్లు బాస్కర్ దర్శకత్వంలో ఫారిన్ బ్యాక్‌డ్రాప్‌లో ఆరెంజ్ సినిమా రూపొంద‌గా, దీని కోసం భారీగా ఖర్చు చేశారు మెగా బ్రదర్.
అన్ని హంగులతో నిర్మించి, భారీ అంచ‌నాల న‌డుమ చిత్రాన్ని విడుదల చేయ‌గా, ఈ మూవీ అంద‌రి అంచనాలు తలక్రిందులు చేస్తూ ఫ్లాప్ సినిమాగా నిలిచింది.. దీంతో నాగబాబుకు కోలుకోలేని దెబ్బ పడింది. కానీ, క్రమంగా ఆ ఇబ్బందులన్నీ అధిగమిస్తూ ఇప్పుడు తిరిగి ఫైనాన్సియల్‌గా స్ట్రాంగ్ అయ్యారు నాగబాబు. అయితే ఆ సమయంలో చిరంజీవి త‌న అప్పులో సగం తీర్చాడు అని చెప్పిన నాగబాబు.. ఆరెంజ్ సినిమాకు గాను రామ్ చరణ్‌కు రెమ్యూనరేషన్ ఇవ్వలేదని, కాకపోతే భవిష్యత్‌లో ఎప్పటికైనా ఆ రెమ్మ్యూనరేషన్ చెల్లిస్తానని కూడా అన్నాడు.
అయితే రీసెంట్‌గా ఆరెంజ్ సినిమా విడుద‌లై 12 ఏళ్లు అయింది. ఈ క్ర‌మంలో రీరిలీజ్ చేయ‌బోతున్నట్టు వార్త‌లు రాగా, దీనిపై క్లారిటీ ఇస్తూ.. నాగబాబు ఓ వీడియో విడుదల చేశారు. క్లాసికల్‌ మూవీ ఆరెంజ్ అద్బుతమైన మ్యూజిక్‌, మనసు దోచే ప్రేమకథతో ఎంతో మంది హృదయాల్లో సుస్థిర స్థానం సంపాదించుకుంది. ఈ చిత్రం 12 ఏండ్లు పూర్తి చేసుకున్న సందర్భంగా అభిమానుల డిమాండ్ మేరకు సరైన సమయంలో ఆరెంజ్ రీ రిలీజ్ చేస్తామని ట్వీట్ చేయ‌గా, ఇప్పుడు ఈ ట్వీట్ నెట్టింట వైరల్ అవుతుంది. అయితే నాగబాబును ఆరంజ్ అంత‌గా ఇబ్బంది పెట్టిన, అవన్నీ మర్చిపోయిన నాగబాబు దాన్ని కల్ట్ క్లాసిక్ అంటుండ‌డం విశేషం.
