Rohit Sharma : ముంబై ఇండియన్స్ కెప్టెన్‌గా రోహిత్ శర్మను తొలగించి.. హార్దిక్ పాండ్యాకు ఆ బాధ్యతలు అప్పగించడంపై ఇప్ప‌టికీ క్రికెట్ వ‌ర్గాల్లో ఆస‌క్తిక‌ర చ‌ర్చ న‌డుస్తుంది. ఫ్రాంచైజీని విజయవంతంగా ముందుకు నడిపిస్తూ.. ఐదుసార్లు ఐపీఎల్ టైటిల్స్ సాధించిపెట్టిన రోహిత్‌ని ఎందుకు సారథిగా పక్కకు తప్పించారంటూ ప్రశ్నల వర్షం కురిపిస్తూనే ఉన్నారు. అయితే ఐపీఎల్ 2024 మినీ ఆక్షన్‌కు ముందే గుజరాత్ టైటాన్స్ సారథిగా ఉన్న హార్దిక్ పాండ్యాను ముంబై ఇండియన్స్ ట్రేడింగ్ విండో ద్వారా జట్టులోకి తీసుకుంది. పూర్తిగా క్యాష్ డీల్ ద్వారా అతన్ని జట్టులోకి తెచ్చుకోంది. ట్రేడింగ్ ప్రక్రియ ముగిసిన వెంటనే హార్దిక్ పాండ్యాను తమ సారథిగా ప్రకటించింది.
అయితే ఈ కెప్టెన్సీ వివాదం కొనసాగుతూనే ఉంది. ఈ నేపథ్యంలోనే.. ముంబై ఇండియన్స్ కోచ్ మార్క్ బోచర్ స్పందించాడు. రోహిత్ స్థానంలో హార్దిక్‌ని సారథిగా నియమించడానికి గల కారణాన్ని రివీల్ చేశాడు.ఇది పూర్తిగా ఓ క్రికెటింగ్ నిర్ణయం. ఒక ప్లేయర్‌గా హార్దిక్‌ని తిరిగి జట్టులోకి తీసుకోవడం కోసం మేము విండో పీరియడ్‌ని చూశాం. నాకు తెలిసినంతవరకు ఇది ఓ పరివర్తన దశ అని భావిస్తాను. అయితే.. చాలామందికి ఈ విషయం అర్థం కాకపోవడంతో భావోద్వేగానికి గురయ్యారు. కానీ.. ఆటకు సంబంధించిన విషయాల్లో భావోద్వేగాలను దూరం పెట్టాలి. రోహిత్ స్థానంలో హార్దిక్‌కి కెప్టెన్సీ బాధ్యతలు అప్పగించడం అనేది ఒక ఆటపరంగా తీసుకున్న నిర్ణయం మాత్రమే.
ఈ నిర్ణయం.. రోహిత్ శర్మను ఒక ప్లేయర్‌గా అత్యుత్తమ ప్రదర్శన కనబరిచేందుకు సహాయం చేస్తుందని నేను అనుకుంటున్నాను. ఇన్నాళ్లూ కెప్టెన్సీ అనే పంజరంలో బందీగా ఉన్న రోహిత్‌ను ఇప్పుడు స్వేచ్ఛగా పరుగులు చేయనివ్వండి’’ అని ఓ స్పోర్ట్స్ పోడ్‌కాస్ట్‌లో మార్క్ బౌచర్ చెప్పుకొచ్చాడు. ముంబై ఇండియన్స్‌తోనే ప్రొఫెషనల్ కెరీర్‌ను ప్రారంభించిన హార్దిక్ పాండ్యా.. రెండేళ్ల విరామం తర్వాత సొంతగూటికి చేరాడు. అయితే హార్దిక్ పాండ్యా రాకను స్వాగతించిన అభిమానులు.. అతనికి సారథ్య బాధ్యతలు అప్పగించడాన్ని మాత్రం జీర్ణించుకోలేకపోతున్నారు. రోహిత్ అభిమానులు మాత్రం ఈ విష‌యంపై చాలా సీరియస్ అవుతున్నారు.
