MS Dhoni : ఐపీఎల్ 2024 ఈ వారం ముగుస్తుంది. ఇప్పటికే గ్రూప్‌ స్టేజ్ మ్యాచ్‌లు పూర్తి కాగా, నాలుగు టీమ్స్ ప్లేఆఫ్స్‌కు చేరుకున్నాయి. రేపటి నుంచి క్వాలిఫయర్స్ మ్యాచ్‌లు జరుగుతాయి. ఈ ఐపీఎల్ ఎడిషన్ మొత్తం బ్యాటర్ల హవా నడిచింది. కోహ్లీ, ధోని, దినేష్ కార్తీక్ లాంటి లెజెండ్స్ ఎప్పటిలాగే బ్యాటుతో సత్తా చాటారు. అయితే ఐపీఎల్ 2025 ఎడిషన్‌కు ముందు మెగా వేలం జరగనుంది. దీంతో అన్ని ఫ్రాంఛైజీలు కొత్త స్క్వాడ్‌తో బరిలోకి దిగవచ్చు. ఇదే సమయంలో కొందరు సీనియర్స్‌కు అవకాశాలు దక్కకపోవచ్చు. వచ్చే ఐపీఎల్ ఎడిషన్ సమయానికి కొంతమంది లెజెండ్స్ రిటైర్మెంట్ ప్రకటించవచ్చు. వారిలో ధోని ఉంటాడ‌ని అంద‌రు భావిస్తున్నారు. రీసెంట్‌గా ఆర్సీబీతో జరిగిన మ్యాచ్ ధోనికి చివరి మ్యాచ్ కావ‌చ్చు అని అంటున్నారు.
రాయల్ ఛాలెంజర్స్ బెంగళూరుతో జరిగిన చివరి లీగ్ మ్యాచ్‌లో ఓడిపోయిన చెన్నై సూపర్ కింగ్స్ ఐపీఎల్ 2024 నుండి నిష్క్రమించింది. ఇప్పుడు అభిమానుల మదిలో ఒకే ఒక్క ప్రశ్న ధోనీకి ఈ సీజన్ చివరిదా? లేదా వచ్చే ఐపీఎల్ లో ఆడ‌తాడా?. దీనికి సంబంధించి సీఎస్కే మాజీ ఓపెనర్ మాథ్యూ హేడెన్ బిగ్ న్యూస్ చెప్పాడు. ధోనీ తన చివరి మ్యాచ్ ఆడాడని హేడెన్ అభిప్రాయపడ్డాడు. ఐపీఎల్ 2024లో ధోని అద్భుతంగా బ్యాటింగ్ తో ఫోర్లు, సిక్సర్లు కొట్టి అభిమానులను అలరించాడు.తమ హీరోని చూసేందుకు ప్రతి మ్యాచ్ లో అభిమానులు సంద‌డి మాములుగా ఉండేది కాదు. ధోని వ‌స్తున్నాడంటే చాలు స్టేడియం హోరెత్తేది.
ధోని రిటైర్మెంట్‌పై సీఎస్కే సీనియ‌ర్ అధికారి ఒక‌రు మాట్లాడుతూ.. ఇంక అత‌ను తన అభిప్రాయాన్ని వెల్ల‌డించ‌లేద‌ని స్ప‌ష్టం చేశారు. తన నిర్ణ‌యం వెల్ల‌డించ‌డానికి మ‌రికొంత స‌మ‌యం తీసుకునే అవ‌కాశం ఉంది. అయితే అత‌ను ఇప్పటికీ ఫిట్‌గా ఉన్నాడు. ఇందుకు సంతోషించాలి. ధోని ఎలాంటి నిర్ణ‌యం తీసుకుంటాడో మాకు తెలియ‌దు. ఎలాంటి నిర్ణ‌యం తీసుకున్నా కూడా మేము స్వాగ‌తిస్తాం అని ఆయ‌న అన్నారు.
