MM Keeravani : మందు తాగ‌డం మానేశాక నా కెరీర్‌కి బ్రేక్ వ‌చ్చింద‌న్న కీర‌వాణి

MM Keeravani : ఆస్కార్ అవార్డ్ విజేత కీర‌వాణి రీసెంట్‌గా నా సామిరంగ చిత్రంతో ప్రేక్ష‌కుల‌ని అల‌రించాడు. నాగార్జున హీరోగా రూపొందిన నా సామిరంగ చిత్రానికి కీర‌వాణి సంగీతం అందించారు. చిత్రానికి చంద్రబోస్ పాటలు రాశారు. ‘నా సామిరంగ’ సినిమా త్వరగా అయిపోవడానికి కీరవాణి కూడా ఒక కారణమని, తనే సినిమాకు స్టార్ అని నాగార్జున ఇప్పటికే ప్రశంసించారు. అయితే మూవీ రిలీజ్‌కు ముందు నాగార్జున, కీరవాణి, చంద్రబోస్ కలిసి ఒక స్పెషల్ ఇంటర్వ్యూ చేశారు. అందులో తన మందు కహానీల గురించి ఆస‌క్తిక‌ర వ్యాఖ్య‌లు చేశారు కీర‌వాణి. ‘నేను చక్రవర్తిగారి దగ్గర జాయిన్ అయినప్పుడు నాకంటే మనో, ప్రసన్న కుమార్ సీనియర్లు. నన్ను ర్యాగింగ్ చేయడం మొదలుపెట్టారు. నువ్వు ఇప్పుడే వచ్చావు కాబట్టి పార్టీ ఇవ్వాలని అన్నారు. నేను అప్పటికీ మందు తాగలేదు. మందు పార్టీ కావాలంటే నా పేమెంట్‌తో పార్కింగ్‌లో, చీకటిలో వారికి పార్టీ ఏర్పాటు చేశాను. బ్రాందీ తెప్పించాను. నువ్వు కూడా తాగాలి అప్పుడే పార్టీ అన్నారు.

నేను స్పాన్సర్‌ను కదా అంటే లేదు తాగాలి అని బెదిరించారు. ఫస్ట్ సిప్ టేస్ట్ ఎలా ఉందంటే.. చనిపోయిన ఎలుకను గ్లాస్ నీళ్లలో వేసి ఒకరోజంతా నానబెడితే ఎలా ఉంటుందో.. అది బ్రాందీ టేస్ట్. ఎందుకు తాగుతున్నారు ఇది టేస్ట్ బాలేదు అన్నాను’’ అంటూ బ్రాందీ టేస్ట్ గురించి కీరవాణి వివరించగానే నాగార్జున, చంద్రబోస్ పడిపడి నవ్వుకున్నారు. చివరిసారిగా తన స్నేహితుడి పెళ్లిలో తాగానని, 1990 నుంచి మందుకు దూరంగా ఉంటున్నానని తెలిపారు కీరవాణి. రాజమౌళి దర్శకత్వంలో తెరకెక్కిన ‘బాహుబలి’ తర్వాత మ్యూజిక్ డైరెక్షన్ నుంచి రిటైర్‌మెంట్ తీసుకోవాలని అనుకున్నారు ఈ సీనియర్ మ్యూజిషియన్. కానీ ‘ఆర్ఆర్ఆర్’ వరకు వెయిట్ చేశారు.

చివరికి ఆ ‘ఆర్ఆర్ఆర్’ వల్లే తెలుగు సినిమాకు ఆస్కార్‌ను తీసుకురాగలిగారు. అంతే కాకుండా రిటైర్‌మెంట్ ఆలోచనను కూడా పక్కన పెట్టారు. నాగార్జున, కీరవాణి కాంబినేషన్‌లో పలు మ్యూజికల్ హిట్స్ వచ్చాయి. తాజాగా విడుదలయిన ‘నా సామిరంగ’కు కూడా కీరవాణి బ్యాక్‌గ్రౌండ్ మ్యూజిక్ ప్లస్ అయ్యిందని ప్రేక్షకులు ప్రశంసిస్తున్నారు. ప్ర‌స్తుతం నా సామిరంగ చిత్రం మంచి క‌లెక్ష‌న్స్ తో దూసుకుపోతుంది.